Tatarstanda da xäzer Meksikadan qalışmasqa buldılar. Çit ildäge yat tormış turında seriallardan tuyıp barğan tamaşaçığa Tatarstan-Yaña ğasır kanalı üzebezdäge yäşäyeş xaqında fil’m töşerergä niätli. Teleradiokompaniä wäkilläre älege serial tatarstanlılarğa başqa illärdä töşerelgän fil’mnardan qızıqlıraq bulır, dip ömetlänä.
Serial 10 öleştän toraçaq. Anıñ rejisserı Nuraniä Camali. Ssenariynı Ruşan Şärif yazğan. Älegä fil’m Yalan ayaqlı qız dip atala ikän. Töşerüçelär süzlärenä qarağanda, fil’m bik aktual’ häm tormışçan bulır kebek. Anda awıldan estrada yoldızı bulırğa teläp Qazanğa kilüçe ber yäş qıznıñ macaraları taswirlanaçaq. Tatarstanda andıy yoldız bulırğa teläwçelär az tügel ikän. 24 aprel’ könne alar Yaña ğasır kanalı yanında cıyıldı. Monda fil’mnı töşerüçelär kasting, qatnaşuçılarnı saylap alu ütkärde. Oyıştıruçılar kastingka üzlären sälätle dip sanağan, cırlıy, bii belä torğan 18dän alıp 25 yäşkä qädär yeget häm qızlarnı çaqırğan idelär. Şuşı iğlan buyınça telekompaniä işek aldına düşämbe irtäsendä yözlägän keşe cıyılğan ide. Alarnıñ kübese respublika awıllarınnan kilep, xäzerge köndä Qazannıñ törle yuğarı uqu yortlarında belem aluçı studentlar ide. Arada qazanlılar da oçraştırğaladı.
Kinoserial yoldızı bulırğa teläwçelär bik taläpçän jyuri aldında üzläreneñ ostalığın kürsätte. Monda alarğa şiğer uqırğa, cır cırlarğa, biergä, başqa hönärlären kürsätergä, fil’mnan ber özekne uynap kürsätergä quştılar. Barısı da bik tırışıp, quşqannı eşlädelär.
24 aprel’ könne Yaña ğasır kompaniäse yanına kilgän yäşlär menä şulay itep cırladı, biede, üzlären maqtadı. Saylap aluçılar köne buyı diärlek alarnı qaradı, tıñladı. Läkin bezneñ tapşıru äzerlängändä bu kastingta fil’m töşerüçelärgä kiräkle serialda uynarğa layıqlı digän keşe tabıldı, yuqmı ikäne äle bilgele tügel ide.
Gölnaz İlgizär
