Башкортстан хастаханәләрендә коронавирус булуда шикләнелгән 41 кеше дәвалана
17 март иртәнге 8.00гә булган мәгълүматка караганда, коронавирус булуда шикләнелеп Башкортстан хастаханәләрендә 41 кеше дәвалану уза, шуларның алтысы – балалар, диде республика сәламәтлек саклау министры Максим Забелин.
Дүшәмбедән Уфа мэриясе коронавирус сәбәпле читтән торып эшләүгә күчә. Киләсе атнадан район башлыклары һәм шәһәр идарәсе хезмәткәрләре видеоконференция аша элемтә тота башлаячак.
Коронавирусның төп билгеләре һәм профилактика чаралары
Гыйлем" берләшмәсе вирусның төп билгеләре һәм профилактика чаралары турында татарча инфографика чыгарды.
Татарстанда 50дән артык кеше катнашулы барлык чараларны тыялар, бөтен театрлар ябыла
19 марттан 15 апрельгә Татарстанның дәүләти һәм муниципаль мәйданчыкларында 50дән артык кеше катнаша торган бөтен мәдәни чаралар тыела дип белдерде Татарстан мәдәният министры Ирада Әюпова. Бу карар концертларга һәм спектакльләргә кагыла, ләкин музейлар үз эшен дәвам итәчәк. Хосусый оешмалар үз мәйданнарында чараларны уздыру яки уздырмауны үзләре хәл итәчәк.
Татарстанда коронавирус йоктыру очрагы теркәлгән
Бу хакта бүген оператив штаб хәбәр итте. Татарстан президенты сүзчесе Лилия Галимова белдергәнчә, сүз Татарстанга килгән Франция ватандашы турында бара. Ул коронавирус билгеләре барлыкка килүгә республика инфекцион хастаханәсенә салынды.
Русиядә COVID-19 вирусын йоктыручылар саны 114кә җиткән. Бу хакта Русия вице-премьеры Татьяна Голикова белдерде. Аларның күпчелеге чит илдән килгән булса, 10 кеше вирусны ил эчендә йоктырган. Вирус йоктыру очраклары Русиянең барлыгы 15 төбәгендә күзәтелә.
Европа футбол беренчелеге кичектерелә
УЕФА быел узарга тиешле Европа футбол беренчелеген коронавирус сәбәпле күчерү карарын кабул итте. Чемпионат 2021 елның җәендә, 11 июньнән 11 июльгә кадәр узачак.
Бүген УЕФА шулай ук Чемпионнар лигасы, Европа лигасы һәм милли чемпионатлар язмышын хәл итәчәк дип көтелә.
Мәктәп укучыларында язгы каникул иртәрәк башланачак
Татарстан президенты Рөстәм Миңнеханов мәктәпләрдә язгы каникул вакытларын үзгәртте. Яллар 19 март, пәнҗешәмбе көнне башланачак.
Моннан тыш Миңнеханов язгы каникулны озайту ихтыяҗы булса, мәктәпләрдә дистанцион уку мөмкинлеге мәсьәләсен өйрәнергә кушты.
Финляндиянең татар мәчетләре ябыла
Финляндия татар мәхәлләсе үзенең Һелсинки һәм Ярвенпәдәге ике мәчетенең ябылуын хәбәр итте. "Коронавирус сәбәпле мәчетләребез вакытлыча ябык булачак", дип язды Фейсбук сәхифәсендә Финляндиянең татар мәхәлләсе имамы Рамил Беляев.
16 март Финляндиядә гадәттән тыш хәл игълан ителде. 18 марттан бөтен мәктәпләр ябыла, уннан артык кеше катнашкан җәмәгать очрашулары тыелды. Мәктәпкәчә тәрбия бирү оешмалары һәм балалар бакчалары эшен дәвам итәчәк. Финляндия хөкүмәте илнең чикләрен ябарга әзерләнә. Соңгы мәгълүматларга караганда, Финляндиядә 100дән артык кеше коронавирус йоктырган.
Мәскәү мәчетләре карантинга ябыла
Мәскәүдә коронавирус таралу куркынычы сәбәпле мәчетләр ябыла. Җәмигъ мәчете, Тарихи мәчет, "Дар" мәдәни үзәге, "Шухада" мемориал мәчете мөселманнарны кабул итүдән туктаячак. Мәчетләрне ябу турында боерыкны Русия мөселманнары диния назәрәте рәисе урынбасары Дамир Мөхетдинов имзалаган.
"Коронавирус таралу куркынычы сәбәпле, көндәлек һәм җомга намазларын туктатып торырга, биш вакыт намазны кизүдәге имам ялгызлыкта уздырырга, никахлар, исем кушуларны эпидемия куркынычы беткәнче уздырмый торырга, ә җеназа намазларын мөмкин кадәр аз кеше катнашында уздырырга" диелгән боерыкта.
Чикләүләр 18 марттан 10 апрельгә кадәр гамәлдә булачак.