Çärşämbedä Romaniä başqalası Buxarestta NATO sammitı açıla. Kön tärtibendä töp mäsälälärneñ berse - Ukraina belän Gruziägä Äğzalıq planın täqdim itü mäsäläse. Amerikan prezidentı George Bush, Buxarestqa barışlıy Kievta tuqtalıp, Ukrainanıñ NATOğa quşılu niätenä xuplaw belderde.
Amerikan prezidentı Kievta iñ yuğarı däräcädä qabul itelde. Moña qädär Buşnıñ Ukrainada bulğanı yuq ide.
Ukraina prezidentı Viktor Yuçenko belän oçraşudan soñ, Buş Ukraina häm Gruziägä NATOnıñ Äğzalıq planın aluda yärdäm wäğdä itte.
"Ukraina häm Gruziä bu planğa alınsın öçen min qulımnan kilgänen eşlärgä cıyınam. Minemçä, bu NATO äğzalarınıñ da, Ukraina belän Gruziäneñ dä mänfäğatendä" – dide Buş.
Läkin Ukrainanıñ alyansqa quşılu yulında
berniçä kirtä bar. Citäkçelär NATO işegen qaqsa da, xalıqnıñ küpçelege anda kerergä telämi. Kievta bu uñaydan qarşılıq çaraları ütte.
Tağın ber kirtä – Rusiä. Räsmi Mäskäw elekke sovet illäreneñ NATOğa kerüenä kisken qarşı.
Nixayät, alyans ağzaları arasında da fiker qarşılığı bar. Äytik, Germaniä belän Fransiä bu ike ilgä Äğzalıq planın birügä qarşı çığa.
Alyans üz qararların bar äğzalarnıñ kileşüe belän qabul itä. Şuña kürä Ukraina belän Gruziä bu yulı maqsatına ireşmäs sıman.
Ul arada, bu planğa elegräk iä bulğan Albaniä, Xorvatiä häm Makedoniä Buxarest sammitında inde tulı xoquqlı äğza bulırğa ömetlänä. Berençe ikeseneñ ömetläre şaqtıy zur bulsa, Makedeoniägä anıñ kürşese Gretsiä ayaq çala – bäxäsle iseme arqasında.
Cıyınnıñ kön tärtibendä tağın ber möhim wä qarşılıqlı mäsälä – Äfğanstan. Quşma Ştatlar häm Britaniä başqa äzğa-illärne könyaqtağı qaynar Helmand, Qandağar vilaytlärenä ğäskär cibärergä öndi. Älegä selkenüçe yuq.
Germaniä belän İtaliä, bezgä tönyaqta da yaxşı, di. Kanada, Hollanda, Romaniä kebek illär, ğomumän, bulğan ğaskärlären dä çığaru turında uylana.
Nixayät, NATO başın awırttırğan tağın ber mäsälä – Rusiä.
"Prezident Putin sammitqa kiläm dide. Älbättä, ul Kosovo, NATOnıñ kiñäyüe turında süzen äytmi qalmas. Läkin şuşı mäsälälärdä qarşılıqlar arqasında NATO belän Rusiäneñ başqa ölkälärdäge xezmättäşlegenä zıyan kiteregä yaramıy" dide NATO başlığı Yap de Hup Sxeffer.
Buxarest samitınnan soñ Buş Xorvatiä, annarı Soçiğa yul totaçaq. Anda ul Putin belän oçraşıp, anı bälki soñğı tapqır, Amerikanıñ Yewropada raketa qalqanı urnaştıru niätenä künderep qararğa tırışaçaq.
Bu ike citäkçeneñ zamanında bergäläp balıq totqan çaqları bar ide. Diñgez hawası bu yulı yärdäm iterme – äytüe qıyın. Raketa qalqanı, Kosovo, Ukraina, Gruziä mäsälälärendä, Waşington belän Mäskäw qaraşları bügen ber-bersennän şaqtıy yıraq tora.