Германия канцлеры Ангела Меркель Буэнос-Айреста Русия президенты Владимир Путин белән очрашты. Канцлер вәкиле Стефан Зайберт журналистларга хәбәр итүенчә, алар Сүриядәге низаг һәм Русия белән Украина арасындагы киеренкелек турында сөйләшкән.
Zu Beginn des zweiten #G20-Gipfeltages in Buenos Aires sprach Kanzlerin #Merkel mit dem russischen Präsidenten Putin. Im Mittelpunkt standen dabei die Lage in Syrien sowie die Situation zwischen Russland und der Ukraine in der Straße von Kertsch und dem Asowschen Meer. pic.twitter.com/zuPyIJaCuL
— Steffen Seibert (@RegSprecher) December 1, 2018
Кремль вәкиле Дмитрий Песков хәбәр итүенчә, Меркель Путиннан әсир итеп алынган украин диңгезчеләрен иреккә чыгарырга сораган, ләкин Путин бу мәсьәлә Русия мәхкәмәсендә хәл ителәчәк дигән.
Песков хәбәр итүенчә, Путин Меркельгә Керич бугазында булган хәл турында тәфсилле аңлатма биргән. Песков сүзләренчә, Киев белән Мәскәү арасындагы хәзерге низагта Көнбатыш илләренең арадашчылык итү мәсьәләсе күтәрелмәгән һәм бу мөмкин дә түгел.
Песков шулай ук Путинның Трамп белән кыскача гына аралашып алуын дә әйтте, ләкин нечкәлекләрен китермәде.
Русия президенты ярдәмчесе Юрий Ушаков сүзләренчә, Путин Трамп белән җентекләп сөйләшү өчен G20 саммиты форсаты кулланылмауга үкенеч белдергән.
Мәгълүм булганча, АКШ президенты Дональд Трамп Буэнос-Айреста Русия президенты Владимир Путин белән очрашудан баш тартты. 30 ноябрь "Америка авазы"на әңгәмәдә ул "Русия Украина корабларын басып алган бу көннәрдә Путин белән очрашу дөрес булмас иде. Ләкин без аның белән кулай вакыт җиткәч соңрак очрашырбыз" дип белдерде.