Qızıqsınğan keşegä qızıq tabıla, ä belmägänneñ beläge tınıç digän ğibärälär bar. Säyäsättä dä, ğadi keşelär tormışında da kötelmägän xikmätle borılışlar bula. Uzğan yılda ber keçkenä at, gäwdäse belän käcädän dä zur bulmağan tulparnı Rusiä Prezidentı Putinğa büläk itü turında mäğlümat çaraları bik citdi itep yazğan idellär. Bu xäl 27 avgustta Qazannıñ yaña ippodromı açılğanda bulğan. Bu näni atnı Putinğa büläk itüçe keşeneñ iseme ul waqıtta Tatarstanda çittä mäğlüm tügel ide. İlsur Metşin Tübän Qama başlığı 55 santimetr bieklegendäge şundıy uq tağın ber atnı Şäymievqa da büläk itte. Putin üzenä eläkkän bäläkäçkä şunda uq Vadik dip isem quşqan häm bik söyenep alıp qaytıp kitkän, äle dä irkäläp, uynap tora ikän. Yaxşı xolıqlı, könenä ber kilogramm peçän häm ber uç solı aşap toruçı näni at Putinnıñ qızlarına da oşağan. Bu atnı poni disälär dä ul, “Trud” gäzite taswirlağança çınlıqta poni tügel, ä ber ingliz seleksionerı çığarğan karlik at. Dönyada mondıy matur can iäläre bik siräk oçrıy. Bu düşämbedä Putinnar ğailäse belän bergä yäşäwçe Vadiknı yañadan iskä alırğa turı kilde. Başqortstannıñ Bäläbäy şähärendä yäşäwçe 5 yäşlek Raynur näq şundıy näni atnı äti – änilärennän taptıra ikän. Raynur xätta üze belgän xäreflär belän Prezident Şäymievqa xat ta yazğan, miña da şundıy at kiräk, birä almasıñ mikän babay dip. Käkre – bökre xärefle mondıy xatnı poçtada almağannar. Raynur Qazan byurosında üzneñ ğözeren tağın äytep birde.
“Min sine yaratam, Şäymiev babay. Xörmätle Mintimer babay, miña keçkenä at, pontiknı büläk itmässeñ mikän. Putinğa birgän kebek. Min aña utırıp yörisem kilä”. Menä bit ölkännär ällä ni iğtibar itmi torğan mäs’älälär, morzalı konek- ğorbunoqqa 5 yäşlek tatar malayı şaq – qatqan. Xäzer ul kön – tön şul at Raynur üze äytmeşli pontik turında uylıy.
Şuşı büläkne uylap çığarğan İlsur Metşin ğädäti tügel ä bik üzençälekle fiker yörtä ikän.
Uzğan yılnıñ avgustında Tübän Qama başlığı İlsur Metşin Respublikanıñ şähär, rayon başlıqları isemennän Qazan şähären 1000 yıllıq belän qotlarğa täqdim itte. Ul Çallı, Minzälä, Älmät, Bögelmä başlıqları belän maxsus cır öyränep, gitara kütärep 30 avgustta stadion qırına çıqtı.
Menä nindi cırnı başqardı Metşin häm şähär başlıqları.
Bu tamaşanı kürüçelär tağın ber qat şaqqattı, çönki İlsur Metşin häm başqa glavalar Qazan dip yazılğan köymäne burlak qiäfätendä tartıp baralar. Alarnıñ sport kostyumnarında Çallı, Minzälä, Tübän Qama şähär isemnäre, ä arqalarında glavalar utırıp yörgän avtomobil'neñ däwlät nomerı zur itep yazılğan ide.
Cırnıñ tekstın uylap çığarğan İlsur Metşin aktual' temanı muzıka estrada ısulları belän kütärep çığarırğa yarata. Kamil İsxakov qaraçqısı quyılğan köymäne tartuçı burlaklar 1000 Qazan balasına mäktäpkä yöri torğan buqçalar büläk ittelär. Bu tarixnıñ däwamı şul: Kamil İsxakov xäzer Yıraq Könçığışta tärtip urnaştıra, ä Qazan dilbegäse İlsur Metşin qulında. Xäzer anıñ keçkenä atlar, gitara, cırlar turında uylarğa waqıtı yuq, çönki Qazan şähäre qaznası buş, 12 milliard sum burıçnı tülise bar. Şulay da İlsur Metşin rok muzıkanı böten Qazan külämendä kütärergä cıyına dilär. Üzeneñ yaratqan cırçısı Andrey Makareviç Qazanğa kilgäç, yäş şähär başlığı Metşinğa çaqırıluı mäğlüm. Bälki ädäbiät häm sänğät yılı ütkärü programmasına İlsur äfände dä berär mögez çığarğan proyekt uylap tabır. Xäzerge şartlarda ğädäti yullar belän atqa da menä almıysıñ, dilbegäne dä qulda totıp bulmıy. Zamanası ikençe xäzer.
Rimzil Wäli