Tarix institutına eşmäkärlär yärdäm itä

Tatarstanda fännär üseşe turında barğan matbuğat oçraşuında Şihabetdin Märcäni isemendäge tarix institutınıñ törle bülek citäkçeläre qatnaştı.

İnstitutnıñ eşlängän eşläre härdaim küz aldında bulğanğamı, alarnıñ küpme häm nindi xezmätlär çığarğannarı, tarixi tikşerenülär turındağı çığışları jurnalistlarğa älläni qızıq bulmadı. Tarix institutına bülengän aqçalarnıñ küläme häm Fännär akademiäsenä saylanaçaq yaña citäkçeneñ kem bulaçağı qızıqsındırdı jurnalistlarnı.

Citäkçe bularaq Rafail Xäkimov bıyıl institutqa 9 million sum aqça bülep birelüen äytte. Läkin aqçanıñ küp öleşen institut üze eşli dip assızıqladı. İğänäçelärdän küp aqça kerüe äytte. Anıñ süzlärenä qarağanda, däwlät tarafınnan bülengän aqça xätta sıyfatlı tösle ber kitap çığaruğa da citmi. Qayber kitap institutnıñ yıllıq byudjetınnan da qimmäträkkä töşä ikän.

Rafail Xäkimov äytüençä, inde eşmäkärlärneñ kübese kottedjlar saldı, maşinalar aldı, xäzer ruxi eşkä yärdäm itärgä teläk belderälär.

Urta ğasır tarixı bülege citäkçese İldus Zahidullin äytüençä, “Tatar tarixı” kitabınıñ 2 nçe öleşen çığarırğa dip Sankt-Peterburgtan Şärifcan Suxov digän eşmäkär şaqtıy aqça küçergän. Häm mondıy sıyfatlı kitaplar çığaru öçen aqça bülüçelär härwaqıt tabıla dielde jurnalistlarğa.

Bilgele bulğança, Rafael' Xäkimov çit illär belän dä urtaq proektlar eşli. Annan da aqçalar kilüe ser tügel. Bu xaqta Rafail Xäkimov bolay dip belderde

Rossiägä çit illärdän aqça kilä. Bezgä dä federalizm institutına inde 5 yıl Ameriqa aqça birä. Bez monı yäşermibez.

Matbuğat oçraşuında jurnalistlar Fännär akademiäseneñ yaña citäkçese kem bulaçağı belän qızıqsındılar. Rafail Xäkimov Fännär akademiäsendäge xäzerge eşçänlegennän qänäğät bulmawın açıqtan-açıq belderde. Yaña bulaçaq citäkçeneñ uñğanlığı turında assızıqladı. Jurnalistlarnıñ qayberläre monı Rafail Xäkimov üze turında süz yörtä dip qabul ittelär. Çönki Xäkimovnıñ fännär akademiäse prezidentı bulırğa teläwe turında räsmi bulmağan mäğlümatlar äledän-äle äytep tora.

Läkin turıdan-turı isemen sorağaç, “Äle bit saylawlar uzmadı”, - dip östäde. Matbuğat oçraşuında qatnaşqan “Watanım Tatarstan” gazetası xäbärçese Räşit Minxacev akademik, Fänni tikşerenü institutı citäkçese Äxmät Mäzgärov bulaçaq digäç Rafail Xäkimov inqar dä itmäde, uñay cawap ta birmäde.

Matbuğat oçraşuında tarixi häykällärneñ yuğalıp baruına borçılu belderelde. Tarix institutınıñ arxeologiä bülege citäkçese Ayrat Sıytdikov häykällärneñ bu ölkädä ayırım nigezlämä bulmawın assızıqladı.

Landış Xarrasova.