Pekin -- İrannıñ atom programması tiräsendäge bäxäsne çişügä şartlar tudıru öçen, Qıtay, İrannı uran bayıtu eşlären tuñdırıp torırğa çaqırdı. Qıtaynıñ Tışqı eşlär Ministrlığı süzçese Liu Cian-çao, söyläşülär uñışlı bulır digän ışanıç belderde. "Bez Rusiä belän İran arasındağı söyläşülärne xuplıybız, alar uñay näticä birer dip ışanabız. Bu şartlarda İran uran bayıtuın tuqtatıp torır dip ömetlänäbez", di Qıtay wäkile. Qıtaynıñ İran belän energetika ölkäsendä tığız bäyläneşläre bar.
