2006 yılda Mäskäw şähäreneñ “Diläfrüz” tatar teatrına 20 yıl tuldı. Şul uñaydan teatr truppası Rusiä töbäkläre buyınça gostrol'lär belän çıqtı. Mäskäw teatrı Tver', Zelenograd, Domodedova, Sankt- Peterburg häm başqa şähärlärdä çığış yasayaçaq. Ä 25 mart könne isä teatr “Aq bars” yäşlär üzägendä Qazan xalqın üz eşçänlege belän tanıştıraçaq. Teatrnıñ citäkçese häm rejisserı Diläfrüz xanım süzlärenä qarağanda, Qazanda truppa üzençälekle programma belän çığış yasayaçaq. Mäskäwdä cämäğätçelek başlanğıçında eşläwçe teatrnıñ Qazanğa säfärläre turında Diläfrüz Xäyrullina “Azatlıq”qa bolay dip belderde.
“Älege tamaşağa bez törle äsärlärdän özeklär alıp qaytabız. Çönki ber äsär genä kürsätsäk, tamaşaçı başqasın kürmi qala. Fänis Yarullinnıñ “Änä kilä avtomobil'…”, Zäki Zäynullinnıñ “Yaña teatr açılğaç…” häm Tufan Miñnullinnıñ “Xatın üzebezneke…” spektakl'lärennän özeklär kürsäteläçäk. İkençe bülektä isä teatr artistları qatnaşında konsert bulaçaq. Ä tänäfestä isä foyeda tamaşaçılar cırlap, biep büläklärgä dä iä bulaçaqlar. ”
Ğädättä, tatar teatrları Qazannan Mäskäwgä häm başqa töbäklärgä barıp çığış yasıy. Ä Mäskäwdän Qazanğa barı tik ataqlı rus teatrlarınıñ böten Rusiägä bilgele artistları kilep, yuğarı sänğät ürnäkläre kürsätep kitälär. Ämma bu yulı kiresençä bulaçaq. Mäskäwdän Tatarstan başqalası Qazan säxnäsenä tatar teatrı qunaqqa kilep çığış yasayaçaq. Tarixta bik siräk oçrıy torğan bu tamaşa 25 mart könne “Aq bars” yäşlär üzägendä uzaçaq.
Gölnaz Şäyxetdin