Çärşämbe könne Qazannıñ “Piramida” mädäni-küñel açu kompleksında Tatarstan Respublikası Prezidentı Mintimer Şäymiev qatnaşında Tatarstan munitsipal' berämlekläreneñ berençe qorıltayı uzdı.
Bilgele bulğança, ağımdağı yılnıñ 17 fevralendä başqalada "Tatarstan Respublikası munitsipal' berämlekläre sovetı" assotsiatsiäsen oyıştıru turındağı kileşügä qul quyılğan ide.
“İntertat” mäğlumatlarına qarağanda, cirle üzidarä orğannarınıñ iqtisadi, xokuki, territorial' nigezlären nığıtu, alarğa metodik yärdäm kürsätü, täcribä urtaqlaşu maqsatı belän buldırılğan Şura üzeneñ berençe qorıltayında ustav qabul itü häm oyışmanıñ räisen saylaw kebek mäs’älälärne kön tärtibenä quydı.
Üzeneñ säğät yarımlıq çığışında Tatarstan prezidentı respublikada xalıqnıñ yäşäw däräcäsen kütärü - alda torğan töp maqsat, dip atadı.
Bu uñaydan M.Şäymiev, buş häm ğomumi süz söyläwdän tuqtarğa quşıp, üze dä konkret mäs’älälärne kütärde. Alar - cirle üzidarälärneñ salım bazasın nığıtu, awıl xucalığına investorlar cälep itü, toraq tözeleşe häm toraq-kommunal' xucalıq, mäğärif, sälämätlek häm qurqınıçsızlıq mäs’äläläre.
Qorıltayda Tatarstan Munitsipal' berämleklär şurasınıñ berençe räise itep Çirmeşän xakimiäte başlığı Minsäğit Şakirov saylandı.
Gölnaz Şäyxetdin