«Tatarstan yäşläre» gäzite, şuşı könnärdä «Menä siña süz irege» digän mäqälä bastırıp çığardı. Gäzit, Başqortstandağı Neftekama şähärendä, «Yaña ğasır» kanalınıñ kabel televideniesennän özelüen xäbär itte. Neftekama şähärendäge «Kiçke Neftekamskiy» xoquq yaqlaw gäzite wäkile Mirzahit Niğmatullin wäzğiätne bolay añlatıp birde. Neftekama şähärendäge millättäşlärebez «Yaña ğasır» sputnik kanalın, kabel televideniese aşa, östämä 24 sum tüläp qarap torğan. Ämma, küptän tügel, elemtä ölkäsendä küzätçelek belän şöğellänüçe federal oyışma , «Rossvyaznadzor» qararı belän, «Yaña ğasır»nıñ tapşıruları kabel televidenie çeltärennän ayırılğan. «Yaña ğasır» kanalın sünderep quyu ğämäle inde ikençe tapqır başqarıla. Berençe tapqır, bu, Başqortstan Prezidentı saylaw aldı kompaniäse waqıtında bulğan. Bu yulı ayırılu Neftekamada ütä torğan başqort qorıltayı belän ber uq waqıtqa turı kilgän. Qorıltay 30 martta bulası ide. Neftekama şähäre çeltärläre kabel televideniegä küçerelgäç, qarawçılar, şuşı şirkätkä bäyle bulıp qaldı di, Mirzahit Niğmätullin. Älege kabel televideniese aşa, federal rusiä kanalları häm «BST» tapşırıla. Moña qädär, şuşı kanallar arasına «Yaña ğasır» da bulğan. Tatarlar küpçelekne täşkil itkän Neftekama şähäre xalqı, yaratıp qarağan kanalnı yuğaltunı awır kiçerä. Tatar oyışmaları protest beldergän. «Tatarstan yäşläre» gäzite, qarşılıq belderüçe xatqa 800 keşeneñ imzası quyıluın xäbär itte. Saylawçılarnıñ mänfäğätlären yaqlarğa teläp, cirle deputatlar da, şähär şurası utırışlarında bu mäs’äläne quyğan bulğan. «Kiçke Neftkamskiy» gäzite wäkile Mirzahit Niğmätullin, şähär deputatları 1 ay eçendä kanalnı kire qabızırğa digän qararnı qabul itkän ide, inde ber ay ütte, ber närsä dä üzgärmäde, dip xäbär itte. Mirzahit Niğmätullin xäbär itkänçä, bu temanı yaqtırtılğan öçen, «Kiçke Neftekamaskiy» häm «Argumentı i Faktı Başqrotostana» gäzitenä qarata şeltä belderelgän. Neftekama şähäre minisipal berämlege başlığı belän matbuğat oçraşuında äytelgän bu süzlär. Räsmi xakimiätläreneñ bu mäs’älägä qaraşı şundıy: alar telägän keşelärgä, iärçen tälinkäsen quydırıp, «Yaña Ğasır»nı şulay qararğa täqdim itä. Kanalnı sünderü, räsmi töstä, Tatarstan kanalınıñ kabel çeltärgä kerer öçen räsmi röxsätläre bulmawı belän añlatıla. «Yaña ğasır» TV kanalı citäkçese urınbasarı Vladimir Matveyev, bezneñ sorawğa, Neftekamskiy kabel televizion çeltäre belän kileşü tözep eşlägän idek, xäzer «Yaña ğasır» kanalı, litsenziä bulmaw säbäple sünderelgän, dide. Vladimir Matveyev äytkänçä, xäzer «Yaña ğasır» kanalı şuşı şähärneñ kabel çeltärenä kerer öçen Mäskäwdän räsmi röxsät alırğa cıyına. Vladimir Matvyeyev äytkänçä, «Yaña ğasır»nıñ, Rusiä cirendä tapşırıluı turında 70läp kileşüe bar. Alarnıñ 5se Başqortostannıñ törle şähärendäge şirkätlär belän tözelgän bulğan. Xäzer, şuşı 5 urında da xällär üzgärgän, alarda «Yaña ğasır» kanalı sünderelgän. Räsmi röxsätne alır öçen, cirle kabel kanalnıñ rizalığı, «Rossvyaznadzor» oyışmasınıñ qararı kiräk. Räsmi käğäzlär kilep citkänçe, yartı yıllap waqıt ütärgä mömkin, di Vladimir Matveyev.
Bikä Timerova.