Ğ. Kamal teatrınıñ zalına cıynalğan tamaşaçı arasında respublikanıñ citäkçeläre dä , kürenekle şağirlär , tanılğan yazuçılar da häm alar belän berrättän studentlar da häm ğomumän, ädäbiät, şiğriät, poeziä söyüçelär cıyılğan ide.
Kiçäne “Qazan utları” jurnalınıñ baş redaktorı Rawil Fäyzullin, başlap cibärde : “Bu bezneñ urtaq bäyrämebez. Bezneñ xalqıbıznıñ iñ zur bäxete, anıñ ädäbiäteder, çönki bez bik zur mirasqa iä”, dip ädäbiät tarixınıñ Borınğı, Bolğar , Altın Urda çorlarınnan kilgän ädäbi äsärlärne iskä töşerep ütte. İñ möhime, Rusiä buyınça ädäbi jurnallar arasında 1000 sanın bäyräm itüçe ber genä jurnal da yuq.”,- dide ul .
“Qazan utları” jurnalınıñ bäyrämenä tağın da ber matur bizäleş kertep, Tatarstan Premyer ministrı urınbasarı, mädäniät ministrı Zilä Välieva, Mintimer Şäymievneñ “Qazan utları” jurnalınıñ bu yubileyı uñayınnan qotlawın citkerde.
Zilä Wälieva “Qazan utları” jurnalınıñ xezmätkärlärenä yubileyğa iñ zur öleş kertkäne öçen Qazannıñ 1000 yıllığı medal'lären Mansur Välievqa, Flyura Sabirovağa häm Gölzadä Bäyrämovağa tapşırdı.
Jurnal “ Qazan utları” isemen yörtkänçe ul başta Ğalimcan İbrahimov möxärrirlegendä “Bezneñ yul” jurnalı bulıp yul açqan, soñraq ul “Ataka”, Sovet ädäbiäte” iseme astında da küp yıllar buyı tatar xalqına xezmät itä.
Bıyıl Ğ.Tuqay bülägenä täqdim itelgän yazuçı, 80 yıllarda jurnalnıñ proza bülegen citäkläwçe Marsel' Ğaliev , şul yıllarda jurnal bitlärendä äsärlären bastıruçılarnı , “Qazan utları” jurnalınıñ yözen , mäslägen saqlap , ädäbiät sağında toruçı yazuçılarnı, üzläreneñ äsärlärendäge här öterenä bik ictihatlı bulğan Ämirxan Yenikinı, Nurixan Fättäxnı, Möxämmät Mähdievne, Ğarif Axunovnı, Ayaz Ğiläcevnı iskä alıp ütte.
Şulay uq jurnalnı telne , ädäbiätne saqlawda köräş mäydanı itkän Tufan Miñnullinğa süz birelde. Ul: “İ, xodayım, i, Täñrem “ Qazan utları” jurnalı üzeneñ 2000, 3000 sanın da bäyräm itärgä yazsın ide! -dide.
Ä bu yubiley kiçäse barışında şiğriät bülege citäkçese Rädif Ğataş, şağirlär Äxsän Bayan , Nuri Arslan, Räşit Äxmätcan, Räşit Gäräy, Nais Ğämbärneñ şiğerläre turında äytep uzsa, Lena Şağircan häm Möxämmät Mirza üzläreneñ şiğerlären uqıdılar .Bügenge “Qazan utları” jurnalınıñ proza bülege mödire Kamil Kärimov tamaşaçını yumor belän dä sıylap aldı.
Kiçädä cırçılar Rafail' Säxäbiev, Aydar Ğabdinov, Mönir Yaqupov, Röstäm Zakirov, Rezeda Ğalimova, Asılyar, Aygöl Sağınbayıvalar qatnaştı.
Rawil Fäyzullin bu kiçäne “ Ömet utı yanar çaqta, sünep barğan uçağına tın örerlek köç bir bezgä digän şiğri süzläre belän tämamladı
Azatlıq radiosı Mälikä Basıyr, Qazan.