Xäzer cirle, yäğni uçastok tabipları här keşe canı öçen üz cannarın birergä äzer bulaçaq. Bilgele bulğança, Rusiä Prezidentınıñ sälämätlek däwlät proyektı nigezendä cirle, yäğni uçastok tabiplarına xezmät xaqına östäp tağın 10 meñ sum qaralğan. Ämma ul xezmät xaqın alu öçen şaqtıy tırışırğa kiräk. Düşämbe könne uzğan matbuğat oçraşuında Tatarstan sälämätlek saqlaw ministrı urınbasarı Änäs Ğıyl'manov şul xaqta söyläde.
Elekke yıllarnı xalıq üz awıruı belän kübräk maxsuslaşqan tabiplar, yäğni xirurq, terapevtlarğa möräcäğät itsä, xäzer sälämätlek öçen berençe çiratta üz cirlegeñdäge, yäğni uçastok tabibı cawaplı. Awıruçılar häm ülüçelär sanı az bulğan sayın uçastok tabibına otışlıraq. Änäs Ğıyl'manov
Uçastok tabibı awıruçınıñ sälämätlege öçen genä tügel, anıñ kiläçäge öçen dä qayğırırğa tieş
Xalıqnıñ sälämätlegen saqlaw çit ilnekenä oxşap bara. Başta diñgez artındağı sımaq meditsina iminlek polisları buldırdılar, xäzer inde här keşeneñ şäxsi tabibı barlıqqa kilep bara.
Soñğı yıllarda tabiplarnıñ iğtibarsızlığına zarlanuları şaqtıy artqan ide. Ayıruça qart-qarçıqlar rizasızlıq belderep kilde. Äye, ul çaqta keşe sälämätlege öçen ayırım ber tabip ta cawaplı tügel ide. Xäzer xäl töptän üzgäräçäk dielde matbuğat oçraşuında. Aqça aldıñ isä – eşlä.
Änäs Ğıyl'manov kiläçäktä şähär cirlegendä, şäfqät tutaşları üzäklären tözü küzdä totıluın äytte. Qan basımın yäisä qandağı şikär mikdaren tikşertü kebek waq mäs'älälär öçen xastaxanägä barıp toru kiräk bulmayaçaq. Şul üzäktä barısın da xäl itäçäklär.
Berniçä yıldan soñ xastaxanälärdä yatıp däwalanular da azayırğa tieş, ambulator, yäğni keşe üze xastaxanägä yörep däwalanuğa küçü küzdä totıla.
Änäs Ğıyl'manov matbuğat oçraşuında awıl cirlegendä tabiplar citmäwgä zarlandı. Qazanda uqu yortın betergän belgeçlärneñ kübeseneñ şähärdä qalu yağın qarıy dide ul. Kiläçäktä bu mäs’äläne xäl itü öçen östämä tüläwlär buldıru farazlana.
Landış Xarrasova