Bıyıl Samar ölkäsendä üzeşçännärneñ konsertları üzenä ber yünäleş aldı. Samar töbägendä tamaşalar Musa Cälilneñ 100 yıllığına häm Ğabdulla Tuqaynıñ 120 yıllığına bağışlandılar. Menä şul çaralar bersennän-berse ayırılıp qına tormadılar äle, alar üseştä bardı. Duslıq yortı qısalarında, Samar qısalarında, annarı ölkä bieklegenä kütärelde häm, nihayät, tügäräkläp “Yalqınlı yäşlek” ansamble Watanıbız başqalası Mäskäwdä uzğan festival'gä barıp qayttı. Mäskäwdä Rusiä külämendä uzğan festival'dä “Yalqınlı yäşlek” ansamble närsäse belän ayırılıp tordı? Cır- biü- şiğriät ansamble niçek kürenä?- digän sorawğa ansambl' citäkçese İlgiz äfände Kälüç bolay dip cawap tottı:
- Festival' Rossiäneñ tuğız töbägen tuplağan ide. Här kollektiv Tuqaynıñ 120 yıllığın küzdä totıp öç säğät yarım buyına ädäbi- muzıykal' programma kürsätte. Tuğız kollektiv arasında 25 keşedän torğan ansambl' tik “Yalqınlı yäşlek” kenä ide. Qalğannarı ayırım cırçılardan torğan törkemnär dip äyter idem. Şuña da bezne festival'ne tügäräklärgä quydılar.
Festival'lärdä soñğı kollektiv itep iñ köçlesen quyalar, närsä “Yalqınlı yäşlek”neñ iñ köçle ikänen aldan sizgännärme?
Äye. Çönki “Yalqınlı yäşlek” turında Tatarstan, Mäskäw matbuğatında materiallar çıqtı. Oyıştıruçılar bezgä ışanğannar häm alarnıñ ışanıçın aqladıq. Finalda yaxşı noqta quydıq.
Tuğız kollektivta kemnär kübräk cırlıy, urta buınmı, ällä yäşlärme?
Kübräk urta buın, bezdäge kebek şaw yäşlärdän torğan kollektivlar yuq.
“Tere” muzıka yañğıradımı?
Barısı da fonogrammağa cırlandı, tik “Yalqınlı yäşlek”tä genä başınnan alıp axırına qädär bayan säxnädä buldı.
Ağımdağı yartı yılda Samarda bik küp cırçılar buldı. Alda bezneñ tamaşaçını kemnär quandırır ikän?
Közge sezon sentäberdä bik köçle kollektiv, Tatarstannıñ ataqlı cır- biü ansamble çığışı belän başlanıp kitäçäk. Biletlarnı Sabantuyda sataçaqbız. Yıl azağında Galiäsgar Qamal teatrı planda.
Şamil Bahautdin,Samar