Rusiä Däwlät Duması ”Mäğärif turında”ğı qanunğa üzgäreşlär kertep – belem birü nigezen böten cirdä bertigez buldırırğa teli. Uqu programmaları da, däresleklär dä böten mäktäplär öçen bertörle bulsın digän fikerdä tora. Älege qanunnıñ proyektı tikşereler öçen xäzer subyektlarğa cibärelgän. Bu xaqta Tatarstan Däwlät Şurasınıñ mädäniät, fän, mäğärif häm milli mäs'älälär komitetı räise Razil Wäliev
Yaña tärtiplär buyınça yaña qaralğan qanun proyektlarınıñ härqaysı Rusiä subyektlarına cibärelä. Ägär subyektlarnıñ öçtän berse kileşmäsä, Rusiä Däwlät Dumasında kileşterü komissiäse tözelä. Häm ul proyekt yañadan qarala.
Çärşämbe könne Tatarstan Däwlät Şurasınıñ mädäniät, fän, mäğärif häm milli mäs'älälär komitetı utırışında da älege qanun proyektı qaraldı häm ike maddäse bäxäslär uyattı. Bu xaqta Razil Wäliev
Rusiädä mäğärif däwlät standartları buyınça federal' komponentlarğa qağılışlı öleşläre 5 yılğa ber qarala. Läkin anda stabil' programma dielgän. Bu ber törle programma digän süz. Bez milli komponentlar buyınça üzebezneñ programmanı qabul itä alabız. Ämma millättäşlärebez şul standartlar belän uqıtırğa tieş bulaçaqlar. İkençedän, stabil' däresleklär digän. Moña qädär mäktäplärdä törle däresleklär belän uqıtu qaralğan ide. Bu törle fiker digän süz. Xäzer ber genä variant täqdim itelsä, bez moña qarşı.
Çärşämbe könne komitet deputatları bu proyektnı qabul itmädelär.
Alar Mäskäwgä üzläreneñ täqdimnären cibärergä uylıylar. Älege täqdimnär xaqında Razil Wäliev
Täqdimnärne TR mäğärif häm fän ministrlığı belän bezneñ komitet deputatları eşläyäçäk. Bez anı ozaqqa suzmasqa uylıybız. İnde fikerlär bar. Bügen söyläşende bu xaqta. Şuşı fikerlärne yuristlar belän käğäzgä töşerep TR Däwlät Şurasında qarağannan soñ Rusiä Däwlät Dumasına yullayaçaqbız.
Bu qanun proyektı belän başqa subyektlar kileşerme älegä bilgesez. Razil Wäliev alar belän dä elemtägä çığıp, alarnıñ da fikerläre belän qızıqsınaçağın äytte. Milli respublikalar bu mäs'älädä bergäläp xäräkät itärgä tieş dip belderde.
Landış Xarrasova