Pänceşämbe könne kiç Tatarstannıñ xalıq şağire Renat Xaris, xalıq artistı İdris Gaziev, rässam Färidä Xäs'yanova, kompozitor Rezeda Äxiärova, pianist häm kompozitor Oleg Lyubives Visaginas şähärenä yul tottılar. Şimbä könne anda “Tatar mädäniäte könnäre” açılaçaq. “Tatar mädäniäte könnäre” 27 may könne Litvanıñ häwäskär kollektivları häm Liliä Musina citäkçelegendäge “Miras” tatar fol'klor ansamble çığışı belän başlanıp kitäçäk. 28 mayda 3нче Baltıyk buyı Saban tuyı ütäçäk. Monnan tış Visaginasta Färidä Xäs'yanova kürgäzmäse açılaçaq. Şulay uq Tatarstan delegatsiäse Litvadağı atom elektr stansiäsen qarar dip kötelä. Bilgele bulğança, Visaginastağı millättäşlärebezneñ küpçelege Sovet zamanında atom elektr stansiäsen tözü öçen kitä häm şunda urnaşıp qala. Alar äle tuğan tellären saqlağan. Ä menä 600 yıl elek anda kilep ğömer kiçerep qalğan millättäşlär inde ana tellären onıtqan. Läkin İslam dinen nıq totalar. “Tatar mädäniäte könnäre” 30 mayğa qädär däwam itäçäk. Comğa könne Çuwaşiäneñ Komsomol rayonında “Urmay moñı” festivalenä dä Qazannıñ Bötendönya tatar kongressı Başqarma komitetı avtobus belän anda ber törkem delegatsiäne alıp kitte. Alar arasında kongress wäkillärennän tış, “Üzebez” xäräkäte yäşläre, cırçılar bar. Tatar kongressınnan belderülärençä, Tatarstan yäşläre Çuwaşiädäge yäş millättäşlärebez belän oçraşıp söyläşü uzdıraçaq, ayırım alğanda iyün ayında ütkäreläçäk 2нче Tatar yäşläre forumı turında fiker alışaçaq. Şimbä könne Çabaqsarda Saban tuyı da uza. Tatarstan wäkilläre anda tatar diskotekasın ütkäräçäk. Ä Tatarstan yazuçıları, Tatarstan Däwlät Şurası deputatları ayırım alğanda Razil Wäliev, Tufan Miñnullin Almaniädä uzuçı yazuçılarnıñ Pen-klub kongressında qatnaşalar. Säfärne faydalıraq itü - yazuçılıq eşen çiratlaştırıp alar anda Berlin şähärendä yäşäwçe tatar-başqort cämäğätçelege belän dä oçraşqan. Şimbä könne Tatarstan yazuçıları Saban tuyında da qatnaşaçaq. Ä iqtisadi elemtälärne nığıtu uñayınnan 27-28 may könnärendä Orenburgnıñ Boğırıslan şähäreneñ “Yubileynaya” mädäniät yortında ciñel sänäğät, tözeleş materialları kürgäzmäse uza. Anda qatnaşu öçen Qazannıñ Bötendönya tatar kongressı Başqarma komitetınıñ tatar eşquarları häm Tatarstan säwdä yortları belän eşläw bülege citäkçese Färit Urazaev, Tatarstan säwdä häm tışqı iqtisadıy xezmättäşlek ministrlığı wäkilläre, berniçä şirqat'lär üz äyberlären täqdim itärgä kitte. Färit Urazaev belderüençä, kürgäzmägä Samara, Tol'yatti, Sarıtaw şähärlärendäge tatar eşmäkärläre kiläçäk.
Landış Xarrasova