Tatar-inform agentlığı xäbär itüençä TR Däwlät xezmät inspeksiäse xezmät xaqın tüläw turındağı zakonnarnı ütäw buyınça küzätep, May ayındağı xäl turında xisap totqan.. Xisap çorında awıl xucalığı , tözeleş häm säwdä şirkätlärendä xezmät xaqın tülämäw oçraqları açıqlanğan.
Xisaptan kürenüençä, “Tatrespotrebsoyuz” qullanuçılar cämğiätendä xezmät qanunnarın bozu oçraqları küp ikän . Tikşerü waqıtında 48 xezmätkärgä 2006 yılnıñ mart- aprel'' ayı öçen xezmät xaqı buyınça burıç- 816,7 meñ sumnan artığraq täşkil itkän.
Tikşerü kürsätüençä, şirkät citäkçeläre xezmät xaqı häm debitor burıçların tüläw buyınça eş alıp barmıy. . Tikşerü näticäläre nigezendä xoquq bozularnı beterü buyınça kürsätmä birelgän . RF xezmät kodeksınıñ 136 matdäseneñ 6 nçı öleşen bozğan öçen awıl säwdäse belän şöğellänüçe yuridik zat “Tatrespotrebsoyuz” oyışmasına, xezmätkärlärenä eş xaqların waqıtında birmägän öçen 30 meñ sum ştraf salınğan. Bu zur summa bulmasa da, aqçasız yäşägän xezmätkärlärne yaqlaw faktı bik küplärneñ küñelen kütärä.
Ä menä distä yıllar buyı kiez itek yasağan “Valkom -N”şirkäten “Qaramay” isemle xosusıy şirkät satıp alğaç ta , eşçelär, xezmät urınnarınnan azat itelgän . Alarnıñ xezmät kenägäläre, döres itep tutırılmağan. Şunlıqtan alar başqa eş urınnarına urnaşa almıylar.
“Valkom –N” şirkäte kiräksez dip tapqan 161 eşçe bu säbäple şirkättän 3 million sum aqça däğwa itä.
Alarnıñ kübese R Zorge uramınıñ 24 sanlı , häm Botaniçesqaya uramında urnaşqan 23 sanlı tulay toraqta yäşilär. Bu turıda küp yıllar buyı bu şirkättä eşläp , bügenge köndä eşsez yörgän Waqif Bilaev, elek bu şirkättä sex citäkçese bulıp eşlägän Cämilä Zinnatullina belderde
“Walkom-N” şirkäteneñ elekkege citäkçese Alimas Välievkä qarata, xezmätkärläre belän tözegän kileşülärne bozu säbäple İdel buyı rayonı prokuraturası cinayät eşe quzğatqan.
Bez bu xällär turında Tekstil'' häm ciñel sänäğät profsoyuzlar federatsiäseneñ Tatarstandağı räise Venera Zarifullinadan beleştek . Ul menä närsälär dide
“Walkom-N” şirkäte” citäkçese Alimas Väliev Rusiäneñ cinayät kodeksınıñ 145 maddäse nigezendä - eşçelärgä 3 aydan artıq xezmät xaqın tülämäwdä häm 196 maddä nigezendä- maxsus räweştä şirkätne bölgenlekkä töşerüdä ğayıplänä”, -dide Venera Zarifullina.
Venera xanım äytüençä, “ Valkom-N” şirkäte eşçelärneñ xezmät kenägälären tapşıru turında “Progress” yuridik agentlığı şirkäte belän kileşü tözegäne turında da äytte. Ämma, eşçelärneñ xezmät kenägälären tutırğan waqıtta:, bu yuridik agentlıq ta eşçelärne eştän azat itüdä , alarnıñ xoquqların bozğan. Bu oçraqta Rusiä xezmät Kodeksınıñ berniçä (66, 82,140, 178, 180, 373) maddäläre bozıla. (TK RF).
Ämma mäxkämä eşe inde 6 tapqır qaralırğa bilgelängän bulsa da, ul äle tögällänmägän. Elekke mäxkämälärgä Alimas Väliev awıru säbäple kilä almağan. Bu yulı mäxkämä utırışı İdel buyı rayonı mäxkämäsendä 16 iyündä säğät 10.00 bilgelängän. Monda qatnaşırğa bügenge köndä eştän azat itelgän häm xezmät kenägäse belän eşkä urnaşa almağan 161 keşe kilergä cıyına. Mäxkämä eşeneñ niçek tögällänüe turında mäğlümat “Azatlıq” radiosı aşa kiläçäktä sezgä citkereler , xörmätle radio tıñlawçılar.
Mälikä Basıyr