Tatarstan Prezidentı Mintimer Şäymiev küptän tügel Sankt-Peterburgta uzğan Watandaşlar kongressında Bötendönya tatar kongressı eşçänlege, millättäşlärebezneñ başqa xalıqlar belän dustanä mönäsäbättä yäşäwe turında ğına söylägän ide söyläwen. Ämma bu çığışnı rus millätçeläreneñ qayberläre üzlärençä añlağan bulsa kiräk. İnde ikençe könne ük “Regnum” mäğlümat agentlığına - Ukraina pravoslau grajdannarı Berlege räise Valeri Kaurov Şäymiev Rusiägä qarşı çığış yasadı dip belderde. Yäğni mäsälän Bötendönya tatar kongressı Başqarma komitetı kebek millätçel oyışmanı yaqladı dip assızıqladı. Tağın berniçä misal kiterde. Bu xaqta “Azatlıq” radiosı inde citkergän ide. Küräseñ Kaurov äfände Rusiädä barı urıslar ğına yäşärgä häm alarnıñ mänfägat'läre genä yaqlanırğa tieşter dip fiker yörtä. Bu könnärdä älege xaqta Qazanğa kilgän Mäskäwdäge “Rusiä watandaşları” oyışması wäkile belän dä söyläşü bulğan. Bötendönya tatar kongressı Başqarma komitetı räiseneñ berençe urınbasarı Renat Wäliullin
Bu könnärdä Qazanğa “Rusiä Watandaşları” oyışması wäkilläre kilde häm anıñ belän söyläşüdä Rusiädän çittä yäşäwçe barlıq xalıqlar berläşep yäşi häm alarnı ayırıp qararğa kiräkmi dip äytelde.
Renat Wäliullin äytüençä, Kaurovnıñ äytelgän fikerläre çittäge millättäşlärebezne şaqtıy ğäcäpländergän häm borçuğa salğan. Renat Wäliullin
Bezgä inde Mäskäwdän, Sankt-Peterburgtan sez bu xaqta beldegezme, nindi mönäsäbät belderdegez dip şaltıratıp borçılu belderdelär
Berençe bulıp bu mäs'älädä üz mönäsäbätlären Almaniä tatarlarınıñ “Doyçland Tatarlar” digän Millätara mädäni xezmättäşlek cämğiäte häm “Tamğa” digän icat berläşmäse wäkilläre belderde. Alarnıñ wäkilläre üzläre ük älege watandaşlar kongressında qatnaşqannar ide. “Regnum”da basılğan Kaurovnıñ belderüennän soñ alar qarşılıq belderdelär. Anda millättäşlärebez - bu Kaurov süzläre Tatarstan prezidentın häm tatarlarnı mısqıl itü genä tügel, ä Şäymiev fikerläre yaqın bulğan başqa millät xalıqların da cäberläw dip belderelä. Bilgele bulğança, çittä Rusiä watandaşlar arasınnan ruslar ğına tügel, ä başqa xalıqlar da şaqtıy yäşi. Ä Kaurov süzlärençä, barı ruslar ğına bu cirdä tulı xoquqqa iä bulıp çığa dip yaza Almaniädäge millättäşlär.
Alar şulay uq kongress barğan ike köndä dä barı rus telen saqlaw, üsterü turında ğına süz alıp barıldı, bilgele ki Şäymievtan başqa tatarlarnıñ ixtıäcların tağın kem qayğırtsın anda. Tatarlar mänfägate turında Seberdän kilgän gubernator söyli almıy bit inde dip belderälär. Kongress barışında härdaim rus tele häm mädäniäte turında ğına söylise tügel, ä kiñräk mäğnädä, yäğni tulayım Rusiä, anda yäşäwçe xalıqlarnı alası ide. Ä bu isä barı Tatarstan Prezidentı Mintimer Şäymiev häm xäzer Törkiädä yäşäwçe Dağstannan bulğan cırçı Äxmät Äxmätovnıñ çığışlarında ğına yañğıradı dip belderä “Doyçland Tatarlar” cämğiäte wäkilläre.
Landış Xarrasova