“Korston” üzäge inde Qazannıñ 1000 yıllığına uq açılırğa tieş ide. Başqalanıñ yubileena äzerlängändä Qazan başlığı bulğan Kamil İsxakov “Kol'so” häm “Korston” säwdä häm küñel açu üzäklären tel töbennän töşermäde – bäyrämgä açılaçaq dide. Räsmi bulmağan mäğlümatlarğa qarağanda, Kamil İsxakov “Korston”nı tözügä üzlegennän genä röxsät birgän bulğan ikän. Zur binalarnıñ Mäskäwdä işelüe waqiğaları küzätelgännän soñ isä, tözelü kompaniälären, proyektlarnı töptän tikşerü başlandı. Bilgele inde üzlegennän genä tözergä röxsät birelgän “Korston”da da gönahlar şul uq waqıtta päyda bula häm anı yañadan diärlek eşli başlıylar. Näticädä, “Kol'so” kibete dä, “Korston” üzäge Qazannıñ 1000 yıllığına tözelep betärgä ölgermäde.
“Korston” Qazannıñ iñ şäp urınnarınıñ bersendä – Ğor'ki isemendäge üzäk yal parkı yanında, başqalanıñ 3 iñ öre yullar kiseşendä tözelde. Elek anda tramvay deposı tora ide – anı da alıp attılar, tramvay yöreşen dä üzgärttelär. Bu küñel açu şähärçege tözeleşenä barı uñay şartlar ğına tudırılıp tordı.
“Korston” - Mäskäwgä qarıy, yäğni ul “Orlenok” dip atalğan kunakxanälär kompleksı eçenä kertelgän kompaniälär törkeme. Rusiä töbäk-respublikalarınnan ul Qazanda berençe bulıp açıldı. Kiläçäktä başqa cirlärdä dä tözeläçäk ikän. Dimäk öre proyekt.
“Korstonnıñ” tantanalı açılışında küp märtäbäle qunaqlar qatnaştı. Tatarstan Prezidentı Mintimer Şäymiev, Qazan merı İlsur Metşin, Mäskäwdän “Korston”ñ citäkçese Anatoliy Kuznetsov, xätta Rusiä Prezidentınıñ Yıraq Könçığıştağı wäkile, “Korston”nı tözü başlanğıçında torğan Kamil İsxakov ta Xabarovskidan xätle kilgän ide. Monnan tış äle wağraq citäkçelär dä şaqtıy buldı. Bu isä älege çaranıñ ni däräcädä iğtibarğa layıq buluın kürsätte. Dimäk monıñ artında zur köçlär, zur aqçalar tora. Äytergä kiräk, üzäkne açu anıñ Mäskäwdäge Korston kompaniäläre citäkçese Kuznetsov äfändeneñ 50 yäşlek yubilee belän turı kilde. Döresräge turı kiterelde. Mäskäwdäge citäkçegä bu kibetne anıñ tuğan könenä açabız dip wäğdä itelgän bulğan. Wäğdä dä tordılar täki.
Bu 14 qatlı üzäkne açqanda Tatarstan Prezidentı xalıqnıñ dustanä mönäsäbättä yäşäwe näticäsendä şundıy küp öre kibetlär päyda bula respublikada dide. Bu “Korston” isä başqalardan şunısı belän ayırıla – monda barlıq küñel açu häm säwdä itü urınnarı ber cirgä tuplanğanlığın äytte. “Korston” eçendä şaqtıy zur kunakxanä, cıyılışlar uzdıra torğan küp zallar, kinoteatrlar, restorannar, barlar, supermarket, cir astı häm cir öste maşinalar quyu urını kergän. Qısqası, kersäñ äylänep çığarlıq tügel.
Läkin sişämbe könne şundıy zur tantana belän açılğan “Korston”da inde ikençe könne ük tıp-tınıç ide. Çönki bu äytelgän zallar, kibetlärneñ berse dä äle äzer tügel, yäğni kunakxanädän tış berni tözelep betmägän. Yaña yıllarğa taba eşli başlar dip farazlana. Ämma bu küñel açu üzägenä ğadi xalıq yörerme anısın äle äytep bulmıy. Üzäkneñ citäkçelege tuğan könnären, başqa bäyrämnärne monda vip-persona, yäğni aqçalı, däräcäle keşelär genä uzdıra alaçaq di. Qayçandır “Qazan” milli mädäniät üzäge kebek binada tuylar, tuğan könnärne uzdıru zur däräcä sanalsa, xäzer isä anda inde härkemgä yul açıq. Ä däräcäle keşelär möğayın “Korston”ğa yul alır. İnde “Veçernyaya Qazan” gäzite Tatarstan Prezidentı Mintimer Şäymiev 70 yäşlek yubileen şunda uzdırırğa cıyına ikän dip yazıp ta çıqtı.
Landış Xarrasova