Yäkşämbe könne Tatarstan möselmannarı Diniä Näzarätendä berençe tapqır möslimä qızları arasında bäyge uzdı. Anı “Möslimä” xatın-qızlar berlege häm “Möslimä” kiem kibete oyıştırdı. Bäygene qararğa kilüçelär şaqtıy küp cıyıldı. Urın citmäw säbäple, kübese basıp qararğa mäcbür buldı. Qunaqlar arasında Prezident Apparatı, mäğärif häm fän ministrlığı, tatar kongressı wäkilläre dä bar ide. Bäygene “Möslimä” xatın-qızlar Berlege räise Nailä Cihanşina alıp bardı.
Bäygedä “Möxämmädiä” mädräsäsennän Xäyät Bädretdinova häm Älfinur İbrahimova, Rusiä İslam universitetınnan Alsu Zakirova, Qazan däwlät universitetınnan Alsu Xaliewa häm El'mira Ğarifullina qatnaştı.
Şulay itep bäygedä 5 tutaş yarıştı. Bäyge 3 öleştän tordı. Anıñ maqsatı turında Nailä Cihanşina:
Bäygeneñ töp maqsatı – ğöref-ğadätlärebezne, ruxi baylığıbıznı, milli yolalarıbıznı saqlap qalu häm yäş buınğa tapşıru. Ni genä disäk tä bez tatarlar. Allahı Täğälä äytkän sezne barığıznı da qäwem-qawem itep yarattım dip. Möslimälärne başqa qızlardan bilgele yawlıq ayırıp tora. Şuñadır bäygedä berençe çiratta iğtibar yawlıq bäyläwgä yunältelde. Nailä Cihanşina:
Bezneñ xalıqta da xatın-qızlar härwaqıt yawlıq bäylägännär. Bügen bäygedä dä bez yawlıq bäyläwgä iğtibar itäçäkbez häm yawlıqnıñ xatın-qız yözen nurlandıruğa ähämiät birerbez. Bez bäygedä 3 tapqır yawlıq bäyläwgä iğtibar yunälteläçäk. Anıñ berençese – köndälek, ikençese – milli häm öçençese nikax waqıtında5 tutaş ta yawlıq bäyläwdä şaqtıy ostalıqların kürsättelär. Yefäk, yon yawlıqlar da, qalfaqlar da, törle-törle töstäge zamança şarflar da qullanıldı. Qızlarnıñ qulları qulğa timäde.
Bäygedä şulay uq tutaşlar milli rizıq peşerüdä, östäl maturlawda, berençe aşığıç yärdäm kürsätüdä, bala törüdä yarıştılar.
Bäygene küzätüçelärneñ qızıqsınuları artqannan-arta tordı. Möselman qızları ir zat küzlärennän üzläre genä bulğanda şaqtıy täwäkkäl ikän dip bilgeläp uzdılar . Azaqta ike qız – Älfinur İbrahimova häm El'mira Ğarifullina berük ballar cıydı. 3 keşedän torğan jyuri qızlarğa İslam dine häm tatar millätenä qarağan sorawlar birdelär. Näticädä berençe urınnı Qazan däwlät universitetınıñ jurnalistika bülegeneñ 5нче kursında belem aluçı El'mira Ğarifullina ciñde. Elmira:
Min yawlıq bäylägäç ir-atlarnıñ mina xörmäte artqanın sizdem. Ul qaplaw çarası da häm usal küzlärdän saqlaw çarası da.Bäyge 3 säğät däwam itte. Şulay uq azaqta möselman kiemnäre täqdim itelde.
Landış Xarrasova