31 dekaberdä irtänge 8дә Tatarstannıñ barlıq mäçetlärendä Qorban bäyräme wäğäze bulaçaq, ä wäğäzdän soñ - tuğız tulırğa 20 minutta ğayıt namazı uqılaçaq. Barı şunnan soñ ğına isä şäriğät buyınça Qorban çalırğa yarıy.
Qazanda isä “Qol-Şärif” mäçetendä uzaçaq Qorban ğayıte namazın möfti Ğosman xäzrät İsxaqi uqıyaçaq. Başqa yıllardan ayırmalı bularaq, Tatarstan möftiläteneñ küpçelek wäkilläre bıyıl xacğa kitkän. Şunda bäyräm itep qaytalar. Ä qalğannar isä üz xästärlären tuğan cirlärendä kürä.
30 dekaber, yäğni şimbä könne Qazannıñ Menjinskiy mädäniät üzägendä yäşlär öçen Qorbanğa bağışlanğan bäyräm uzaçaq. Şulay uq yäşlär yaratıp yörgän “Söläyman” mäçete bıyıl da barlıq Qorban çaldırırğa teläwçelär öçen mömkinlek buldırğan. Ber sarıq 3 meñ 300 tora. Çalıp ta eşkärtep tä birälär. Mäçetneñ imamı İldar Bayazitov äytüençä, inde bügenge köndä 100дән artıq keşe sarıq çaldırırğa teläk beldergän. Äle şuşı ike köndä alar tağın da artaçağın äytä İldar Bayazitov. Küpläre çalınğan sarıqnıñ 3тән ber öleşen mäçetkä qaldırıp kitä ikän. İldar Bayazitov anı moxtaclarğa tarataçaqların belderde. İnde isemlekne bilgelägännär. Ğomumän Qorban ite kemgä bülenergä tieşlege turında “Azatlıq”qa Qazan şähäre üzäk töbäkläreneñ baş qazıyı Röstäm xäzrät Zinnurov:
Qorbannı 3 öleşkä bülü – ğailägä, tuğannarğa häm meskennärgä tieş. “Mädinä” mäçetendä taratu eşläre alıp barıla, şähärneñ Sovet rayonı xakimiäte belän moxtaclarnıñ adresların alıp alarğa Qorban iten taratalar.
Qızğanıçqa qarşı, respublikanıñ siräk rayonında mäçetlärdä Qorban çaldıru oyıştırılğan. Çınlıqta isä anda da küp yalğız äbilär-apalar Qorban çaldırırğa teli, alar inde kürşe külängä, tuğanğa yalınırğa tieş bula.
Röstäm xäzrät Zinnurov belderüençä, Qorbannı öç kön buyına çalırğa yarıy. Tağın qayber neçkäleklär turında Röstäm xäzrät Zinnurov:
Ğayıt namazına qädär çalınğan Qorban ğadi it kenä bulıp qala, şuña kürä aşıqmasqa kiräk. Barı 9 tulıp kitkäç kenä Qorban çalına ala. Anı 3 kön çalırğa mömkin. Ämma ike köndä çalıp betersäñ yaxşıraq bula.
Qazan şähäre üzäk töbäkläreneñ baş qazıyı Röstäm xäzrät Zinnurov belderüençä, respublikada Qorban çaldırırğa teläwçelär yıldan-yıl arta bara ikän. Bıyıl Tatarstannan xacğa 1000 nän artıq keşe kitte. Alar da anda isä Qorban çaldıraçaqlar.
Landış Xarrasova