Ğinwar ayında Tatarstannıñ Älki rayonında da, Çuaşstan respublikası buylap ta, çuaş xalqınıñ böyek şağire Peder Xuzanğaynıñ tuuına 100 yıl tuluğa bağışlanğan bäyräm kiçäläre görläp uzdı. Peder Xuzanğay - ul kürenekle ädäbiät häm mädäniät ähele, çuaş respublikasınıñ xalıq şağire, Konstantin İvanov isemendäge Däwlät premiä lawreatı.
Ğinwarnıñ şuşı könnärendä Çuaşstan başqalası Çabaqsarda Peder Xuzanğaynıñ häykäle yanında miting uzdı, şulay uq şağirneñ icatına bağışlanğan kürgäzmälär oyıştırıldı.
Ä 18 ğinwarda Tatarstannıñ Älki rayonınıñ Sixtermä awılında tantanalı kiçä uzdı.
Peder Xuzanğay - Tatarstan respublikasınıñ Älki rayonınıñ Sixtermä awılında tuğan. Çuaş poeziäseneñ üseşe häm çäçäk atuı anıñ iseme belän bäyle.
Peder Xuzanğay çuaş ädäbiäten, üz tuğan xalqınıñ tarixı, bügengese häm kiläçäge turında icat itkän tirän fikerle äsärläre belän bayıttı. Anıñ küp kenä äsärläre çuaş xalqı poeziäseneñ ber ürnäge bulıp tora.
Ul şulay uq tanılğan tärcemäçe dä, çuaş yazuçılarınıñ icatına bağışlanğan ädäbi- tänqidi yazma häm bäyälämälär avtorı da.
Ağımdağı yılnıñ 22 ğinwarında anıñ tuuına 100 yıl tuldı.
Şuşı uñaydan 23 ğinwarda Çuaşstannıñ drama teatrı binasında tantanalı kiçä uzdı. Anda Tatarstan wäkilläre dä qatnaştı. Mäsälän , respublikanıñ mädäniät ministrı wäkile Aydar Ğaynutdinov, Peder Xuzanğaynıñ tuuına 100 tulu uñayınnan Tatarstan prezidentı Mintimer Şäymievneñ barlıq çuaş xalqına yullanğan qotlaw xatın citkerde. Anda tatar häm çuaş xalıqların berläşterüdä häm ike xalıqnıñ duslığın nığıtuda şağirneñ icatınıñ zur ähämiäte turında äytelä.
Tatarstan Yazuçılar berlege isemennän bu tantanada qatnaşqan Tatarstannnıñ xalıq şağire Renat Xaris, Peder Xuzanğaynıñ icatında çuaş xalqınıñ ğöref-ğadätläre dönyadağı başqa xalıqlarnıñ ğöref-ğadätläre belän bergä ürelgänen äytte.
18 ğinwarda Peder Xuzanğaynıñ icatına bağışlanğan tantanalı kiçä Tatarstannıñ Älki rayonında Sixtermä awılında uzdı . Kiçä turında Azatlıq radiosına “Mädäni comğa” gäziteneñ jurnalistı Niaz Aqmal söyläde.
Çuaşstannan kilgän delegatsiä wäkilläre arasında Çuaşstannıñ xalıq şağire, Çuaşstannıñ professional yazuçılar berlege citäkçese Valeriy Turğay da bar ide. Tatarstan delegatsiä wäkilläre arasında Renat Xaris kilgän ide. Tantanalı kiçädä Çuaşstan drama teatr kollektivı häm Çuaşstan filarmoniäseneñ “Çağal” fol'klor ansamble artistları bik matur cırlı-biyülle uyınnar kürsättelär. Xuzanğaynıñ ğibrätle awır tormışı , yazmışı turında söyläşülär üzençälekle ber fänni-ğamäli konferensiägä äwerelde. Älki munitsipal' rayon başlığı Ferdinant Däwlätşin bolay dip belderde: “Bez Xuzanğaynıñ bu olı yubileyına şaqtıy eşlär eşlädek. Aldağı könnärdä bu eşlärne alıp baraçaqbız häm kiläçäktä Xuzanğay iseme bu töbäkneñ matur ber simvolı bulıp äwereläçäk” dip belderde.
Niaz Aqmal Xuzanğaynıñ ğibrätle yazmışı häm anıñ isemeneñ çığışı turında da äytep uzdı.
Ul Çuaşstan pedagogik texnikumın tämamlağannan soñ , Qazanğa kilä, Könçığış institutında uqıy. Monda ul Ğädel Qutuy , Hadi Taqtaş, Xäsän Tufan, Musa Cälil kebek şağirlär belän aralaşa. Bik küp şağirlärebezneñ şiğerlären çuaş telenä tärcemä itä. Xuzanğay turında bezneñ şağirlärebez dä bik küp yazğan. Anıñ xaqında Sibğat Xäkim, Xäsän Tufan, Renat Xaris kebek şağirlär anıñ şiğerlären tärcemä itkännär häm anıñ turında şiğerlär yazğannar. Anıñ xaqında xätta Vladimir Mayakovskiy da yazğan .
Sixtermädä uzğan kiçädä Çuaşstannan kilgän qunaqlar Çabaqsarda basılğan Xuzanğaynıñ 6 tomlıq saylanma äsärlären alıp kilgännär. Şağirneñ ulı- Adler Xuzanğay ätise isän çaqta qullanğan yazu maşinkasın büläk itkän. Çuaşstannan kilgän qunaqlar muzeyğa, mäktäpkä, kitapxanägä tağın bik küp büläklär qaldırğannar.
Mälikä Basıyr