Qazanda ber atna buyı 19 keşedän torğan Yevropa üseş häm tözekländerü bankı delegatsiäse wäkilläre bulıp kitte. Bilgele bulğança, 20-21 may könnärendä Tatarstan başqalasında banknıñ idärälär Şurasınıñ yıllıq utırışı häm Eşlekle forum uzaçaq. Älege zur çarağa äzerlek 2006 yılda uq başlanıp kitte. Bu yulı Qazanğa kilgän delegatsiä wäkilläre dä äzerlekneñ niçek baruı belän tanışırğa kilgännär.
Yevropa tözekländerü häm üseş bankınıñ İdärä Şurasınıñ yıllıq utırışı möğayın bıyıl Tatarstandağı iñ zur iqtisadi çaralarnıñ berse bulır. Anda barlığı banknıñ törle illärdäge 62 idärä itüçeläre, eşmäkärlär kiläçäk. Ägär elegräk qatnaşuçılar sanı 2 meñgä yaqın bula dielsä, xäzer ul sannarnı 3 meñ dilär. Bilgele bulğança, yıllıq cıyılışnı Qazanda ütkärü turındağı qarar 2006 yılnıñ aprelendä İdärä Şurası äğzalarınıñ tawış birü näticäsendä qabul itelgän ide. Şunnan soñ inde äzerlek nisbätennän Tatarstanğa küp kenä delegatsiälär kilep kitte. Şulay uq oktäberdä Londonda uzğan Tatarstannıñ berençe investitsion sammitında respublika prezidentı Mintimer Şäymiev Yevropa bankı prezidentı Jan Lemyer belän dä oçraşıp älege utırış turında söyläşkän ide. Qısqası çarasına kürä äzerlege dä şaqtıy yuğarı töstä bara.
Ğinwar azağında Qazanğa kilgän Yevropa bankınıñ 19 keşelek delegatsiäse Tatarstan Prezidentı Apparatınıñ tışqı eşlär departamentı, “Tatmedia” ğammäwi mäğlümat çaraları agentlığında buldılar, şulay uq Tatarstan tamojnyası, “Qazan” Xalıqara hawa alanı wäkilläre belän oçraştılar. Monnan tış utırışnıñ töp çaraları uzaçaq “Korston” häm “Piramida” üzäkläre belän tanıştılar. Soñğı könne isä näticä yasaw öçen Tatarstan Xökümäte apparatı citäkçese Şamil Ğaffarov räislegendä Yevropa bankı wäkilläreneñ utırışqa äzerlek buyınça eşçe törkeme äğzaları belän kiñäşmäse oyıştırıldı. Anda qaralğan mäs'älälär turında Tatarstan Premyer ministrı yärdämçese İskändär Möflixanov:
Oçraşu barışında Yevropa tözekländerü häm üseş bankı prezidentınıñ Qazanğa säfäre, ayırım alğanda Jan Lemyernıñ Tatarstan Prezidentı häm respublika Premyer-ministrı belän oçraşuı turında süz bardı. Şulay uq çaralar uzaçaq “Korston” üzäge häm 20-21 may könnärendä qunaqlar urnaşaçaq kunakxanälär turında söyläşülär buldı.İskändär Möflixanov äytüençä, älege utırış aldınnan Qazanda 19 may könne Tatarstannıñ investitsion-iqtisadi Xalıqara biznes forumı da uzaçaq. Yäğni älege utırışnı ütkärüçe töbäk bularaq Tatarstannıñ şundıy mömkinlege bar ikän. İskändär Möflixanov:
Bez monnan qullanırğa buldıq. Yäğni biredä kürgäzmälär, östämä söyläşülär, täqdim itülär uzaçaq. Bu kübräk keşelär bezneñ respublika turında belsennär öçen, şulay uq alar belän elemtälär urnaştıru, duslar buldıru öçen kiräk. Tatarstan Premyer-ministrı yärdämçese İskändär Möflixanov fikerlären işettegez. Äytergä kiräk, älege Eşlekle forumnı uzdıru turındağı söyläşü Tatarstan säwdä häm tışqı iqtisadıy xezmättäşlek ministrlığında da süz barğan. Älege forumğa Rusiä töbäklärennän häm çit illärdän, ayırım alğanda Tatarstanğa investitsiälär kertä alırlıq wäkillär kiler dip kötelä.
Landış Xarrasova