Çärşämbe könne Qazannıñ Zur konsertlar zalında Tatarstan respublikası Däwlät Şurasınıñ utızınçı utırışı uzdı häm anda respublika Prezidentı Mintimer Şäymievneñ Däwlät Şurasına yullaması citkerelde. Bu çarada härwaqıttağıça respublika citäkçeläre, ayırım alğanda deputatlar, ministrlar, oyışma citäkçeläre, Tatarstannıñ çit il häm Rusiä töbäklärendäge wäkilläre qatnaştı.
Utırış aldınnan İrek mäydanı qarşında äbi-babaylar toraq-kommunal' xucalıq öçen bäyälär artuğa qänäğätsezlek belderep uram cıyını uzdırdı. “Ğädel Rusiä” firqäsen maqtap yazğan şiğär'lär totqan äbi-babaylar bersennän-berse yalqınlı çığışlar söyläde, türälärne sükte. Läkin maşinada cilderep uzğan citäkçelär moña älläni iğtibar itmädelär. Ni disäñ dä saylawlar citä häm monı härkem üz faydasına qullanıp qalırğa tırışa.
Tatarstan respublikası Prezidentınıñ Däwlät şurasına Yullaması citkerelgändä dä Mintimer Şäymiev saylawlar citügä basım yasap kitte. Äytergä kiräk yullamanıñ tatarçası isä 88 bittän tora ide. Küplär öçen ul qullanma bularaq ta xezmät itä ala, çönki möhim mäğlümatlar-sannar şaqtıy kiterelgän. Mintimer Şäymiev isä Yullamanı 6 zur öleşkä bülep söyläde. Alar Tatarstannıñ sotsial'-säyäsi xäle, mädäniät, İqtisadnı üsterü, däwlät idäräse oyışmaları aldında torğan burıçlarğa nigezlängän ide.
Şäymiev isä üz çığışın respublikada yäşäp kilgän millätlär häm dinnär arasındağı tatulıq, xalıqara eşçänlekne üsterü, mädäniät dairäsendäge mäğlümatlarnı citkerü belän başlap cibärde. Mintimer Şäymiev:
Gumanitar ölkädä dä xalıqara elemtälär arta. Qayber illär mädäniät könnären uzdırdılar häm Tatarstan belän xezmättäşlek üzäklären açtılar. Luvr, Böyekbritaniä muzeyları, Ufitssa galereyası muzeyları belän elemtälär urnaştırıldı.Mintimer Şäymiev 2007 yılnı Tatarstanda küp möhim çaralar kötelüen äytte. Bu Yevropa tözekländerü häm üseş bankınıñ yıllıq utırışı, şulay uq bıyıl berençe tapqır cäy könne Tatarstan xalıqlarınıñ cıyını uzaçaq. Monnan tış 4нче Bötendönya tatar kongressınıñ Qorıltayı kötelä. Mintimer Şäymiev tağın uzğan yıl Sankt-Peterburgta ütkärelgän Rusiä watandaşlar kongressın bıyıl Qazanda uzdıru küzdä totıluın äytte. Millättäşlär turında şaqtıy söyläp M. Şäymiev:
Ministrlar Kabinetına çit illärdä yäşäwçe millättäşlärebezneñ küçenep qaytuı buyınça bäyle 2007-2012 yılğa isäplängän respublika programmasın tiz arada qabul itüne eşlärgä kiräk.Mintimer Şäymiev Rusiä belän Tatarstan arasındağı Şartnamägä dä tuqtaldı. Anıñ tiräsendä barğan neçkäleklärne bäyän itte. M. Şäymiev:
Qızğanıç, läkin bezneñ il qanunnarı yış qına subyektlarğa qarağan yäisä urtaq idärädäge mäs’älälärne cayğa saluda kirägennän artıq kisken eş itä. Bezneñ deputatlarğa mondıy qanunnarnıñ qısaların bilgeläwdä qatıraq köräşergä kiräk. Finans baylıqlarnı üzäkläşterü buyınça däwam itä torğan protsesslarğa säyäsi-xoquqi bäyä birelergä tieş.Tatarstan Prezidentı isä ikençe töp basımnı sotsial' säyäsät, iqtisatqa yasadı. Ayırım alğanda xezmät xaqların arttıru, citeşterüne üsterü kiräklegen assızıqladı. Küp kenä säwdä noqtalarında yomırqa, qazılıq, söt äyberläre çittän kertelügä Prezident qänäğätsezlek belderep ayıruça tänqitläp uzdı. Ul Qazanda urnaşqan Ramstor, Perekrestok, Paterson, Pyateroçka kebek federal' kibetläre dä satıla torğan it-söt äyberläreneñ küpmese üzebezdä citeşterelüen, küpmese çittän kertelüen äytep uzdı.
Mintimer Şäymiev çığışınıñ ikençe öleşendä investitsiälär mäs’äläsenä tuqtaldı. Köndäşkä sälätle produksiä çığarırğa kiräklekkä basım yasadı.
Landış Xarrasova