Bu könnärdä “Tatmedia” agentlığınıñ kiñäytelgän utırışı uzdı. Anda härwaqıttağıça, kübräk räsmi matbağalarnıñ citäkçeläre cıyılğan ide, ämma ni säbäptänder xäzer xalıq kübräk şäxsi, ikençe törle äytkändä “waq” gäzitlärgä östenlek birä ikän.
“Tatamedia” utırışında qatnaşqan Tatarstan Premyer-ministrı Röstäm Miñnexanovnıñ nihayät jurnalistlarğa ışanıçı artqan. Elek Xökümät başlığı Röstäm äfändeneñ matbağa wäkillären älläni söymi ikän digän xäbärlär taralğan ide. Premyer-ministrnıñ fikerläre küräseñ üzgärgän. Utırışta Röstäm Miñnexanov nihayät jurnalistlarnı yaratuına basım yasadı. Bu isä küplärneñ yöräklärenä may bulıp yattı. Şuña östäp äle Premyer-ministr däwlätneke bulğan massaküläm mäğlümat çaralarında eşläwçelärne sotsial' ipoteka nigezendä toraq belän tä'min itärgä kiräklegenä dä basım yasadı. Tatarstan toraq fondı citäkçese Tälğät Abdullinğa maxsus yöklämä birde. Äytergä kiräk, bu kübräk tatar gazeta-jurnalları häm radio-televideniesendä eşläwçelärgä qarıy. Çönki
Qazanda çığuçı näq tatar telle matbağalarnıñ kübesendä awıldan çıqqan yäşlär eşli. Berençe çiratta toraqqa alar moxtac.
“Tatmedia” citäkçese Marat Moratov härwaqıttağıça yıllıq eşçänlekkä xisap tottı. Tatarstanda 1200гә yaqın massaküläm mäğlümat çarası çığuın äytte. Şularnıñ 850 tiräse basma räweştä näşer itelä, yäğni gäzit-jurnallar. Ber qarasañ bu şaqtıy zur sannar, ämma şunıñ 110 ğına tatar telendä. Bıyıl tatar tele gäzitläre arasında iñ küp tirajnı härwaqıttağıça “Tatarstan yäşläre” cıyğan – barlığı 44 meñnär artıq keşe yazılğan. Rus gäzitläre arasında “Vostoçnıy ekspress” isä 66 meñ danä çığa.
Utırışta räsmi gäzit wäkilläre üzlären borçığan mäsälälärgä tuqtaldılar. Ayırım alğanda “Watanım Tatarstan” gäzite baş möxärrire Miñnazıym Säfärov isä bügenge köndä xalıq räsmi basmalar urınına kübräk şäxsi - wağraq gäcitlärgä östenlek birä başlağanın bäyän itte. Bilgele bulğança, xäzer “Aqçarlaq”, “Urtaq tüşäk”, “İrek mäydanı” “Bezneñ gäcit”, “Käyef niçek” kebek törledä-törle gäzitlär arta bara. Alar älläni sallı yazmalar birmäsälär dä, eksklyuziv, yäğni başqa matbağalarda kürenmägän yazmalar birep xalıq küñelen yaulıy. Tatar waq-töyaq uqıy dielde. Ä räsmi basmalarnıñ tirajı kimi. Mäsälän, Xökümät häm Däwlät Şurasına qarağan “Watanım Tatarstan” 19 meñ bulıp qına çığa. Miñnexanov monı bik az buluın assızıqladı häm zaman şartlarında üz-üzeñne täqdim itärgä öyränergä kiräk dip tänqit utına da tottı, ayırım alğanda menedjmentnı üsterügä basım yasarğa quştı. Şulay uq ul sıyfatnı yaxşırtırğa kiräk tä dip tä östäde. Ğomumän Röstäm Miñnexanov tatar basması aldında mondıy problema toruın bötenläy belmägänlegenä işarä itte häm ayırım oçraşıp söyläşergä kiräklegen äytte. Xökümät häm Däwlät şurası xällären tatar uquçısına citkerüçe “Watanım Tatarstan” gäziteneñ şundıy xäldä buluın Röstäm Miñnexanovnı borçuğa saldı bulsa kiräk.
Landış Xarrasova