28 iyüldä Qazan-Mäskäw şartnamäseneñ qayber matdäläre ğämäldän çığarılaçaq.

Sişämbe könne, “Tatarstan - yaña ğasır” ictimaği-säyäsi xäräkätenä 3 yıl tulu uñayınnan, säyäsi şurasınıñ kiñäytelgän utırışı buldı. 3 yıl eçendä «Tatarstan - yaña ğasır» xäräkäte şaqtıy nığıdı. Bu xäräkät täqdim itkän 721 namzätneñ 649-ı xalıq deputatları itep saylanğan. Şuña kürä, ictimaği-säyäsi xäräkätneñ räise Färit Möxämmätşin şuşı deputatlar aşa ictimaği tormışqa real’ tä’sir yasıy alabız, dip sanıy. «Tatarstan - yaña ğasır»nıñ sişämbe könne ütkän yubiley utırışında da süz real’ mäs'älälär turında bardı. Rusiä belän Tatarstan arasında wäkälätlär büleşü turındağı şartnamägä üzgäreşlär kertü turında. Möxämmätşin äytüençä, 1994 yılğı Şartnamä inde xäzer Federal üzäk taläplärenä turı kilmi. Anıñ federal qanunnarğa qarşı kilä torğan urınnarı bar. Şuña kürä, 28 iyüldän Şartnamäneñ şundıy qarşılıqlı matdäläre ğämäldän çığaçaq. Möxämmätşin yaña Şartnamä proyektı eşläwneñ berençe öleşe tämamlandı, dip belderde. Şuşı könnärdä maxsus kommisiä wäkälätlär büleşü kileşüeneñ yaña proektın prezidentaa täqdim itäçäk. Anda Tatarstannıñ ğömüm federal qırğa kermi qalğan wäkälätläre nığıtılırğa tieş. Häm iñ möhime, Şartnamädä, prezident wazıyfasına namzätneñ ike däwlät telen, urısça da, tatarça da belü taläbe kertelergä tieş. Şundıy nigezlämä inde Tatarstan Konstitutsiäseneñ yaña redaksiäsenä kertelgän.