Qazanğa Ğata Kamskiy kilde.

2 iyül könne Qazanğa, Amerikadan tanılğan şaxmat ostası Ğata Kamskiy kilde. Ul Tatarstanda ale 7 kön bulaçaq. Qazanğa kilüeneñ berençe säğätlärendä ul, Tatarstannıñ yäşlär eşläre häm sport ministrlığı citäkçelege belän oçraştı. Ğata Kamskiynı, gädättägeçä, atası Röstäm äfände ozatıp yöri. Yäşlär eşläre häm sport ministrı Marat Bariev belän oçraşqanda dä, kübräk Röstäm äfände söyläde. Alar New-Yorkta inde 10 yıl yäşi. Ğata, universitetta yuristlıqqa uqi. Tağın 2 yıl uqisı qalğan. Şaxmat belän şöğellänüen bik belendermi ikän. Röstäm äfände barı tik keçkenä genä açıq turnirlarda qatnaşuların sizderde häm Tatarstanda da şundıy turnir ütkärergä täqdim itte. Amerikada yäşäwebez bik mäşäqätle, tığız, bernärsägä dä waqıtıbız yuk, dide. Marat Barievnıñ Qazanğa nindi teläklär belän kilüläre, anda niçek yäşäwläre turındağı sorawına Ğata häm Röstäm äfände ikese dä cawap birde: Ğata Kamskiy: Yäş şaxmatçılarga yardäm itü mömkinlege mine bik quandıra. Marat Bariyev: Amerikada 10 yıl yäşäp, urıs telen niçek onıtmadığız? Röstäm Kamskiy: New-Yorkta xäzer qaya qarama urısça söyläşälär. Baştaraq, tatarlar belän dä yış oçraşıp tordıq. Bez kilğändä New-Yorkta Qazannan küçkän 60-70 tatar ğailäse yäşi ide. Xäzer tatarlarnıñ sanı ber meñ çaması buladır inde. Ber yartı yıl min oçraşular oyıştırıp kildem. 200-läp keşe kilä ide. Annan soñ, bu eşne alıp baru miña awır buldı, taşladım. New-Yorktağı tatar oyışmasın İldar Agiş citäkli ide. Qazandağı abruylı keşelär belän min anı tanıştırdım. Soñınnan ul biznes eşlärenä kerep çumdı da, tatar oyışmasın taşladı. Anda räis bulıp torırğa miña täqdim itkännär ide, ämma tatarça belmäw säbäple, üzemne bu eşkä layık tüğel dip sanadım. Ğata Kamskiynıñ 10 yıldan soñ Tatarstanğa kilüen oyıştıruçı - «Sälät» yäşlär ictimaği waqıfı. Bu yılnıñ ğınwar ayında «Sälät» citäkçelege Ğata Kamskiy belän elemtägä çığıp, anıñ yardäme belän Qazanda çittän torıp şaxmat öyränü mäktäben açqannar. Ğata Kamskiy bu kilüendä «Sälät»neñ cäyläwlärendä şaxmat söyüçe yäşlär belän oçraşaçaq, ber yulı berniçä taqtada uynaw seansların uzdıraçaq. Sişämbe könne kiç belän, şundıy oçraşu Qazannan 30 çaqrımda urnaşqan «Sälät-Rawşan» cäyläwendä uzdı. Ğata Kamskiy şulay uq, «Sälät» neñ Älmättäge, Bilärdäge cäyläwlärendä bulaçaq. 7 iyüldä Bilärdä yäşlär festivalendä qatnaşaçaq. Ä ber kön aldan, Qazanda «tatar yäşläre könnäre» açılaçaq dip farazlana.