Mintimer Şäymiev tärbiägä bala alıp üsterüçe xatınnar belän oçraştı

Ber qarasañ, uzıp kitkän yal könnäreneñ simvolı küñelgä yatışlı häm keşelekle. Tatarstan prezidentı qulında aq yonnan bäylängän oyıqbaşlar häm biäläylär. Şimbä könne Mintimer Şäymiev yätim qalğan balalarnı tärbiägä alıp üsterüçe xatınnar belän oçraştı. Menä şuşı märxämätle xanımnar prezidentqa buş qul belän kilmäs öçen oyıqbaşlar häm pirçätkälär bäyläp kitergännär. Ä üzläre qarawsız narasıylar öçen cılıtuçı da, aşatuçı da. Tatarstan prezidentı alarğa räxmät äytep kenä qalmıyça, alarnıñ xucalıq, könküreş mäs’äläläre belän qızıqsındı. Mondıy oçraşular Tatarstanda xatın-qızlar, ğailälär, bala tärbiäläw kebek möhim töşençälärgä zur iğtibar birelüen kürsätä.

Ä ğomümän alğanda, bik ük märxämätle häm tınıç tügel bu könnär. Cepşek qar, bozlawıq yullarnı xätär suqmaqlarğa äyländerde. İqtisad ministrı, premyer-ministr urınbasarı Aleksey Paxomov Çallı yulında maşina qazasına duçar buldı. Anıñ xäle qänäğätlänerlek, ämmä şoferı bik qatı imgängän. Aqtanış telekompaniäseneñ direktorı İlsur Timerov berniçä kön elek şulay uq maşinada avariägä eläkkän ide. Ul haman da bik awır xäldä. Anıñ ğomereneñ qurqınıç astında buluın belderep häm tieşle gruppalı häm rezuslı qan birergä täqdim itep yasalğan iğlannar berniçä kön televidenie ekrannarında buldı. Şulay uq Çallı yulında Tatarstan Eçke eşlär ministrlığınıñ 3 ofitserı maşinada äylänep häläk buldı.