Qazanda, ğınvar başında «Tatar cırı 2002» xalıqara premiäsen tapşıru tantanası dip atalğan çara uzğannan soñ, Tatarstannıñ mädäniät ministrlığı üzeneñ «Tatar cırı» dip atalğan festivalen yañadan ütkärä başlawı turında iğlan itte. Bıyıldan başlap ul İlham Şakirov iseme belän ütäçäk. Anda tatarlar yäşägän Rusiä regionnarınnan, respublika rayonnarınnan, şähärlärennän üzeşçän häm professional artistlar qatnaşa ala. 1 martta bäygeneñ berençe öleşenä ğarizalar qabul itü tämamlanırğa tieş bulsa da, oyıştıruçılar bu şartnı beraz üzgärtergä buldı. Qazanda yäşäwçelär anı 27 martqa qädär tapşıra ala, ä respublika rayonnarında yäşäwçelär öçen zona bäygelärenä kilep, qatnaşu telägen belderü dä citä. Zonalarda ütäçäk bäygelärneñ juri räise Rif Ğataullin xäbär itkänçä, bügenge köndä oyıştıru komitetı 40tan artıq ğarizanı qabul itkän inde. Qatnaşırğa teläk belderüçelär arasında yäşüsmer balalar da, küpmeder täcribä tuplap ölgergän artistlar da bar. Berençe zona bäygese 11martta Buyada başlanaçaq, annan soñ 13 martta Rif Gataullin citäkçelegendäge juri Saba rayonına baraçaq, 17-sendä alar Sarmanda, 18ndä Çallıda bulaçaq. Professional kompozitorlar häm cır belgeçlärennän torğan juri nindi talantlarnı ezläp tabır, kiläçäk säxnä yoldızları kem bulır. Älegä bu xaqta farazlar qorırğa irtäräk bulsa da, Rif Ğataullinnıñ şul turıda fikerläre bar. Başqortstannıñ «Duslıq moñı» festivalendä ciñgän ber yäş cırçı da älege «Tatar cırı» bäygesendä qatnaşırğa teläk beldergän ikän.
Ul bik köçle köndäş bulır dip kötelä. Anı häm başqa Başqortstan talantların kürep qaytqan Rif Ğataullin, äñgämä waqıtında, kürşelär Tatarstan cırçıların uzdırıp cibärmägäye, dip kisätep quydı. Küräsen, Başqortstandağı tatarlarda milli moñnar yaxşıraq saqlanğan, dip äytte ul bezgä. Milli, ozın köylärne cırlıy belmägän başqaruçılar bäygeneñ berençe basqıçınnan uk töşep qalaçaq, dip ışandırdı Rif Ğataullin.
