Amerikan xärbi hawa köçläre bügen Bağdadtağı radio häm televideniä stansiälärenä häm şähärneñ xalıq yäşägän rayonnarına höcüm itte. Bu xaqta Ğiraqnıñ Mäğlümat ministrı Mohamed Said al-Sahhaf Bağdadta uzğan matbuğat oçraşuında elerde: Bombalar häm raketalar Ğiraq radio häm televideniäsenä, tamojnya binasına , Bağdad tiräsendäge tınıç xalıq yäşägän rayonnarğa töşkän, dide al-Sahhaf.
Ğiraqnıñ Mäğlümat ministrı, xalıqtan 1 keşe häläk bulğan häm tağın ber-niçäse yaralanğan dip xäbär itte. Amerikan räsmiläre birgän mäğlümatlärgä qarağanda 40 raketa häm 900 kilogram awırlığı bulğan 4 bomba, Ğiraq citäkçeläre oçraşuı uza dip farazlanğan cirlärgä atılğan. Çaranıñ uñışqa ireşüe xaqında mäğlümat yuq.
Höcüm başlanğaç ta Ğiraq televidiniäsendä Säddäm Xösäin çığış yasadı. Çığış turı efirda bardımı, yäisä aldan yazılğan bulğanmı-busı mäğlüm tügel. Ğiraq mäğlümat ministrı şulay uq, Ğiraqta “scud” raketaları yuq, dip belderde. Läkin Amerikan, Britan häm Kuwait xärbi wäkilläre belderüenä qarağanda, Ğiraqnıñ Kuwaitqa bügen atqan 6 raketanıñ berniçäse “scud” raketaları bulğan. Häläk buluçılar turında xäbärlär yuq.
Ğiraqnıñ könyağında amerikan boralağı cirgä töşte dip xäbär itelä. Boralaq bärep töşerelmägän. Anda bulğan 6 keşe qotlarılğan. Häläk buluçılar yuq. Pentagon bu xaqta tulıraq mäğlümat birüdän baş tarttı.
