Bügen Bağdadta bulğan atışlar näticäsendä 2 jurnalist häläk buldı häm kimendä 4se yaralandı. Çit il jurnalistlarınıñ kübese yäşägän fälestin otelenä amerikan tankınnan atılğan raketadan milläte belän Ukrain bulğan Reuters televideniäse operatorı Taras Protsyuk häläk buldı, tağın 3 keşe yaralanğan. 3nçe cir öste ğaskärläre diviziäse başlığı general Buford Blount, oteldän ut açılğaç cawap itep binağa ber tapqır tanktan atıldı, dip xäbär itte. Moña qadär bügen Quşma Ştatlar xärbi hawa köçläreneñ Bağdadnı bombalawı näticäsendä Äl-Jazeera televideniäse xäbärçese Tareb Ayoub häläk bulğan dip xäbär itelde. Ğaräp dönyasındağı iñ populyar televideniä kanalınıñ tağın ber xäbärçese yaralanğan. 20 Marttan birle barğan bu Ğiraq suğışın yaqtırqanda kimendä 8 jurnalist häläk buldı.
Xalıqara Jurnalistlar Federatsiäse general sekretare Aidan White Brusseldä uzğan matbuğat oçraşuında, jurnalistlarnıñ ülemendä Ğiraq xakimiäten dä, Quşma Ştatları citäkçelegendäge koalitsiä köçlären dä ğayepläde häm faciğane tikşerüne taläp itte.
“ Bezneñçä, mäğlümat çaraları häm jurnalistlarğa yasalğan höcümnär-suğış cinäyätläre, häm bez bu uñaydan borçılu belderäbez. Bolar-bik citdi qanun bozular bulıp tora. Bu xälne bäysez belgeçlär tikşerergä tieş”, dide Aidan White.
Kiçä Ğiraq xärbiläre tarafınnan urlanğan ike Polşa jurnalistınıñ bügen totqınlıqtan isän-saw qotılğan buluları turında xäbär itelde. Marsin Firlej häm Jasek Kasmarek ikese dä Polşanıñ törle televideniä kanalları xäbärçeläre, Nassiriya şähärennän Bağdadqa taba barğan yulda totqarlanğan, soñınnan Ğiraq xärbiläre jurnalistlarnı mäktäp binasında yabıp totqan. Firlej, Ğiraq ğaskärläreneñ alarğa yaxşı möğamälä kürsätkäne turında xäbär itte.
