Dönya Sälämätlek Saqlaw oyışması Qıtay xökümäten yaña tör üpkä yalqınsınuı belän çirläwçe barlıq awırular turında täfsille xisap tapşırırğa quştı. Oyışmanıñ matbuğat wäkile Chris Powell Frans Press Mäğlümat Agentlığına, Qıtay räsmiläre SARS virusına qağılışlı yaña statistika iğlan itte, dip belderde. Qıtay tabiplarınıñ Time jurnalına birgän mäğlümatlärenä qarağanda virusnı yoqtıru oçraqlarınıñ kübese xäbär itelmägän.
SARS virusı yä başqaça äytsäk pnevmoniäneñ yaña töre dönyada 100dän artıq keşeneñ ğömeren özde, awırular sanı 2 meñ 800dän arttı. Bügen Qazaxstan räsmiläre, respublikada berençe tapqır ber awıru SARS virusın yoqtırğanında şiklänelep xastaxanägä salındı, dip xäbär itte. Şulay uq ul keşe belän elemtädä torğan tağın 15 keşe dä küzätügä alınğan.
Rumıniä prezidentı İon İliescu ay azağına Qıtayğa planlaştırılğan säfären kiçekterde, dip xäbär itelä.
