Äzerbaycannıñ general' prokuraturası Saylaw turındağı qanunda, "ägär prezident, sälämätlege säbäple wazifasınnan kitsä, saylawlar kiçekterelä" digän matdäne köçennän çığarırğa täqdim itte. Bu matdädä: "ägär saylawlar waqıtında prezident, sälämätlege säbäple wazifasınnan kitsä, yä wafat bulsa, saylawlar tuqtatıla, häm 3 ay eçendä yaña saylawlar bilgelänä" dielgän ide. Quşma Ştatlarda däwalanıp yatqan 80 yäşlek Xäydär Aliev, 15 üktäberdä ütäçäk saylawlarda, prezident urını öçen 3nçe tapqır köräşergä cıyına. Namzätlär arasında: anıñ, uzğan atnada premier-ministr itep bilgelängän, 41 yäşlek ulı, İlham da bar. Qayber opozitsiä citäkçeläre, prokuratura täqdimen, İlhamnıñ ciñep çığaçağına ışanıçın sürätläw, dip atadı. Başqalar isä, saylawlar niçek bilgelängän şulay ütergä tieş, dip, täqdimgä xuplaw belderde. Äzerbaycan mäglümät çaraları xäbär itüençä, Konstitutsion mäxkämä prokuratura täqdimen kiläse atnağa qararğa cıyına.
