Saylaw aldı kampaniäse qızğannan-qıza bara. Xäzer inde nämzätlärneñ televizor, radio aşa sipkän wäğdäläreneñ iñ quyırğan çağı. Könnär suınıp barğanda, Tatarstan başqalasındağı kibetlärdä buşlay sıra birä başladılar. Uramdağı qayber kibetlärdä menä şundıy iğlan elengän. Ägär dä “Qızıl Şärıq” firması çığarğan litr yarımlı ike şeşä sıra alsañ, öçençe şeşä buşqa birelä. Deputatlıqqa qayber nämzätlär “Qızıl Şärıq” sırasınıñ reklaması Ayrat Xäyrullinğa agitatsiä bulıp tora dip, mäxkämägä ällä qayçan birgän idelär. İvan Graçevnıñ küpsanlı portretların cete qara buyaw belän bozıp kitkän idelär. Xäzer şul buyawlı urınnarğa «Yaxşı keşene pıçratıp bulmıy”, digän iğlannar quyılğan. Çittän qarap torğan keşelär, sänğät yağınnan möläyım qara taplarnı aldan uq uylap eşlängän aksiä digän näticä yasıylar.
Mintimer Şäymiev “Rossiyskaya gazeta” xäbärçese Nina Fadeyevağa federalizmnıñ tamırları turında söylägän. Ul respublikalarnı beterügä qarşı çığa. Respublikalar federal' üzäk buldıra almağan eşlärne başqara, dip beldergän Mintimer Şäymiev. Rusiä tatarlarınıñ ruxi ixtiäcların iñ berençe çiratta Tatarstan qänäğätländerä. Şul uq interv'yuda Mintimer Şäymiev Däwlät Dumasınıñ älifba buyınça qararı belän kileşmäwen belderä.