Anı oyıştırğan oyışmalar arasında “Söyembikä” digän xatın-qızlar xoquqların yaqlaw fondı da buldı. Güzäl Kozlova citäkçelegendäge älege oyışma, Amerika ilçelege ütkärgän bäygedä qatnaşıp, «Aq yawlıq» digän proyektları belän ciñgän bulğan. Tüzemlelek häm dinara mönäsäbätlärenä bağışlanğan älege proyektnı tormışqa aşıru öçen Amerikanıñ ilçelege bu oyışmağa 10 meñ dollar bülep çığarğan. Çärşämbe, 17nçe dekaberdä Tatarstan Diniä näzaräte binasında ütkärelgän seminar, şuşı «Aq Yawlıq» proyektı qısalarında uzdırğan soñğı çara bulıp tora. Moña qädär, sotsiologik tikşerenülär, häm Yäşel Üzän şähärendä dinara mönäsäbätlärgä bağışlanğan seminar uzdırılğan bulğan.
Ä çärşämbe könne uzğan çarada, ictimaği häm däwlät oyışmalarınıñ respublikada tüzemlelekne häm düstanä dinara mönäsäbätlärne nığıtu yünäleşendä eşlägän eşlärgä bağışlandı. Seminarda, qunaq räweşendä çığış yasağan keşe xoquqları öçen cawaplı wäkil Räşit Wäğizov, xalıqlar xoquqlarına az iğtibar birelä, dip bilgeläp ütte. Rusiäneñ millätlär säyäsäte turında maxsus qanunnıñ bulmaw, terrorçılarnı islam dine belän bäyläp kürsätü, tatar xalqına latin grafikasına küçärgä röxsät itmäw – törle millät wäkilläre arasında tüzemlelekne nığıtuğa bulışmıy, dide Räşit Wäğizov. Seminarda qatnaşqan, Din eşläre şurası räise urınbasarı da, respublikada, dinnär arasındağı mönäsäbätlärne nığıtu öçen eşlänä torğan eşlär xaqında söyläde.
Diniä näzaräte räise urınbasarı Wäliulla xäzrät Yaqup, möselman xatın-qızlarına pasport räsemenä yawlıq kiep töşärgä röxsät itü – tolerantlıqqa iltä torğan yul, dip belderde. Möselman xatın-qızlar oyışması räise Älmira Äditatullina da şul uq fikerdä tora. Ul äle genä Törkiädä ütkän xatın-qızlar qorıltayınnan qanatlanıp qaytqan häm yawlıq kiep räsmi dokumentqa räsem yasatu köräşe belän zur qızıqsınu uyatqan. Rusiädä yawlıq mäs’äläse xäl itelde, ä menä Fransiädä yawlıq bäyläwne bötenläw tıyarğa toralar. Bu xaqta möselman xatın-qızlar oyışması räise borçılu belderde.Bikä Timerova