Амур өлкәсендәге мәгъдәнлектә һәлак булган 13 таучы истәлегенә Башкортстанда һәйкәл ачылачак. Бу хакта 7×7 басмасы хәбәр итә.
Хакимиятләр һәйкәлне Сибайда урнаштырачак. Һәлак булган эшчеләрнең дүртесе шушы шәһәрдән. Фаҗига булып өч атна үткәннән соң, шәһәр башлыгы Азамат Юлдашбаев шахтачыларның туганнарының кайгысын уртаклашты.
Мәгъдәнлектә коткару эшләре 1 апрельдә тәмамланды. Коткару эшләре тау токымнары кабат ишелү һәм коткаручыларга зыян килү куркынычы сәбәпле туктады. Яңа борауланган тишекләрдән күренгәнчә, эшчеләр була алган урын тау калдыклары һәм су белән тулган.
Җимереклекләр астында калган 13 кешене - шул исәптән Башкортстанның биш ир-егетен дә һәлак булды дип таныдылар. "Пионер" мәгъдәнлеге карый торган "Покровский рудник" ширкәтендә һәлак булган таучыларның гаиләләрендәге һәр әгъзага (әти-әнисе, тормыш иптәше, балалары) шахтачының бер еллык хезмәт хакы кадәр акча биреләчәк дип белдерделәр. Шулай ук ширкәт таучыларның балаларына балигъ булганчыга кадәр ай саен әтиләренең бер айлык хезмәт хакы кадәр акча биреп барачак.
- "Пионер" мәгъдәнлегендә тау токымнары 18 мартта җимерелде. Бу Русиядә алтын чыгаручы иң зур оешмаларның берсе. Эчтә 13 кеше калды. Шахта җимереклекләре астында калган бөтен эшчеләр дә монда вахта белән башка төбәкләрдән килеп эшләгән.
- 29 мартта Амур өлкәсендәге "Пионер" мәгъдәнлегендә җимереклекләр астында калган Башкортстан шахтачыларының берсе - Вадим Николаевның гаиләсе Сhange.org сайтында петиция чыгарган иде. Русия президенты Владимир Путиннан Амур өлкәсендәге "Пионер" шахтасыннан шахтачыларны коткару белән бәйле хәлне контрольгә алуын сорыйм. Телевизордан алдыйлар. Чынлыкта булганча сөйләмиләр. Вакытны әрәм итәләр, кешеләр үләргә мөмкин, зинһар, булышыгыз. Вакытны нигә сузарга?"диелгән мөрәҗәгатьтә.
- Mkset мәгъдәнлектә җимерелгән тау токымнары астында калган Башкортстан шахтачыларының шәхесләре турында язма чыгарды. "Бу - Юрий Марков, Вадим Николаев, Ролан Шәрипов, Олег Симонов (дүртесе дә Сибайдан) һәм Эмиль Вәлиханов (Учалыдан). Алар рок-музыка белән кызыксынган, балаларын тәрбияләгән һәм гомерләренең күп елын авыр хезмәткә багышлаган", диелә хәбәрдә.
- Шул ук вакытта "Пионер" шахтасы җимереклекләре астында ятучы Башкортстан эшчеләренең туганнары үзләренә хакимияттән игътибар булмавын искәртте. Мәсәлән, берсенең хатыны "АиФ" басмасына мәгъдәнлек белән бәйле бөтен яңалыкларны медиадан беләм, республика хакимиятләре безнең белән элемтәгә чыкмады дигән иде.
🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!