"Хакимият фиркасе һәм аның куштаннарына каршы" дигән шигар белән үткән митингта җәмәгать активистлары, экологлар, хокук яклаучылар, сәясәтчеләр катнашты.
Чыгыш ясаучылар сайлаучыларга "Караклар хакимиятенә нокта куй!" дигән өндәмә белән мөрәҗәгать итте. Алар сайлаучыларны 4 декабрьдә үтәчәк Дума сайлауда барлык партияләргә дә каршы тавыш бирергә чакырды, чөнки әлеге сайлауны ирексез дип саный.
Митингта барлыгы ике меңнән артык кеше катнашты. Алар Мәскәүдән генә түгел, Русиянең башка төбәкләреннән дә килгән иде.
Мондый митингларны 4 декабрь – сайлау көненә кадәр уздырырга килешенде.
