Кырым низагы. Вакыйгалар дисбесе

КЫРЫМДА ВАЗГЫЯТЬ ТЕЛЕВИЗОРДАН КҮРСӘТЕЛГӘНЧӘ ТҮГЕЛ -- Татарстан төркемендә Кырымда төрле очрашуларда катнашып кайткан Югары шура депутаты Роберт Миңнуллин барып үз күзебез белән күргәч, андагы вазгыятьнең монда телевидениедә күрсәтелгәнчә булмавын аңладык, диде. Миңнуллин әйтүенчә, Кырымда төп каршылык урыслар белән кырымтатарлар арасында. Күпчелекне тәшкил итүче урыслар Русиягә кушылу шигарләре күтәрсә, кырымтатарлар Украинада калырга теләүләрен ачык итеп белдерә.

НАТО МӘСКӘҮНЕ КИСӘТӘ -- НАТО генераль-секретаре Андерс Фог Расмуссен Русиянең Украинага гаскәр кертүе Европаның тынычлыгына һәм иминлегенә куркыныч тудыра дип белдерде. Ул Мәскәүне көч кулланудан ваз кичеп, Украинадагы вазгЫятьне җайга салу өчен ашыгыч чаралар күрергә чакырды.

КЫРЫМТАТАРЛАР РУСИЯГӘ КУШЫЛЫРГА ТЕЛӘМИ -- Кырымда төрле тарафлар белән очрашуларда булып кайткан Татарстан вәкилләре Казанда матбугат очрашуы үткәрде. Татарстан Югары шурасының Мәгариф, мәдәният, милли мәсьәләләр комитеты рәисе Разил Вәлиев кырымтатарларның нигә Украинада калырга теләвен аңлатты. Аның әйтүенчә, кырымтатарлар Русиядә түгел, ә Европа хокукый киңлекләренә керергә теләүче Украинада үз хокукларының сакланачагын әйткән.

ТАТАРСТАН ДЕПУТАТЛАРЫ КОНСТАНТИНОВ БЕЛӘН ОЧРАШТЫ -- Кырымда сәфәрдә булган Татарстан депутатлары Кырым Югары Радасы рәисе Константинов белән очрашкан. Разил Валиев Азатлыкка әйтүенчә, алар аңа "әгәр кырымтатарларның мәнфәгатьләре, таләпләре искә алынмаса, бу Кырымда зур проблемаларга юл ачачак" дип кисәткән.

УКРАИНАДА МОБИЛИЗАЦИЯ ИГЪЛАН ИТЕЛДЕ -- Украинаның Милли иминлек һәм саклану шурасы секретаре Андрий Парубий Русиянең басып керү куркынычы сәбәпле илдә гомум мобилизация игълан ителү турында белдерде. Саклану министрлыгына бар ил буйлап резервистлар тупларга күрсәтмә бирелгән. Белдерүдә әйтелгәнчә, бу чара "Украинаның иминлеген һәм бөтенлеген саклау" өчен күрелә. /AR, Reuters/

ЗЕМФИРА УКРАИНАГА ТЕЛӘКТӘШЛЕК БЕЛДЕРДЕ--
Танылган җырчы Земфира (Земфира Рамазанова) үзенең сайтыннан барлык мәгълүматны бетереп, кара фон өстендә бары тик бер материал калдырган - Украин телендә башкарылган җырының видеоязмасын. “Океан Эльзы” төркеменең “Отпусти” дип аталган әлеге җырын ул 2008 елда ук украин музыкантларына теләктәшлек белдереп җырлаган иде.

Җырчының сайтына әлеге үзгәреш 1 мартта кич, Русия президенты Владимир Путин Украинада гаскәр куллану үтенече белән Федерация шурасына мөрәҗәгать иткәч кертелде.

ОБАМА ПУТИННЫ КИСӘТТЕ -- АКШ президенты Барак Обама Русия президенты Владимир Путинны Русия гаскәрләрен Кырымдагы ныгытмаларына кайтарырга чакырды. Шимбә көнне Путин белән телефон аша сөйләшеп Обама, Мәскәүнең халыкара кануннарны бозуын дәвам итүе "аның сәяси һәм икътисади изоляциясен" көчәйтәчәк, дип кисәтте./AP, AFP, Reuters/

УКРАИНА ГАСКӘРЕН ӘЗЕРЛӘДЕ--
Украин армиясе тулы хәрби әзерлек хәленә китерелде. Мондый карарны 1 март кичендә Украинаның милли иминлек һәм саклану шурасы кабул иткән. Президент вазифаларын башкаручы Александр Турчинов сүзләренчә, бу "потенциаль агрессия" сәбәбе аркасында эшләнелгән.