Кырым низагы. Вакыйгалар дисбесе

Икътисадлары алга киткән G-7 илләре җитәкчеләре, Европа шурасы һәм Европа комиссиясе президентлары Русияне "Украинаның мөстәкыйльлеген һәм территориаль бөтенлеген бозуда" гаепләгән уртак белдерү ясады. Белдерүдә әйтелгәнчә, алар июньдә Сочида үтәсе G-8 саммитына әзерлек эшләрен туктатыр торырга карар иткән. G-7 төркеменә Британия, Канада, Франция, Германия, Италия, Япония һәм АКШ керә. /AP, Reuters/

Украинаның иң бай кешесе, заманында Януковичка хакимияткә килергә ярдәм иткән дип саналган эшкуар Ринат Әхмәтов Украина халкына мөрәҗәгать белән чыкты. Әлеге мөрәҗәгатендә ул Украинада озакка сузылган сәяси низаг илнең бөтенлеген җимерә ала дип кисәтә һәм моны булдырмас өчен бар ватандашларны берләшергә чакыра. Әхмәтов Украинада читтән көч куллануны урынсыз дип саный һәм низагны тыныч юл белән чишәргә өнди. Икътисадны төп сәяси көч дип атап Әхмәтов илнең эшкуарларын берләшергә, солых урнаштыру эшенә акчаларын кызганмаска чакыра. Бар Украина буйлап 300 мең кешене берләштергән СКМ төркеме илнең бөтенлеген саклап калу өчен барын да эшләячәк ди СКМ президенты Ринат Әхмәтов.

КЕШЕ ХОКУКЛАРЫ ШУРАСЫ СУГЫШ БАШЛАМАСКА ЧАКЫРА -- Русия президенты каршындагы Ватандашлык җәмгыятен үстерү һәм кеше хокуклары шурасы президент Владимир Путинны Украинага каршы сугыш башламаска чакыра. Шура әгъзаларының президентка мөрәҗәгатендә "Без Русиянең, халыкара йөкләмәләренә каршы килеп, күрше дәүләтнең суверенлыгын бозып тышкы көч куллану андагы хокук бозуларга һич тә тиңдәш түгел дип исәплибез. Аерым алганда, Кырымдагы һөҗүмнәр, тәртипсезлекләр һәм үтерүләр турындагы мәгълүмат дөреслеккә туры килми һәм арттырылган. Кеше хокуклары шурасының Кырымга киткән әгъзасы Андрей Юров белдерүенчә, тыныч халык арасында да, хәрбиләр арасында да Федерация шурасындагы чыгышларда әйтелгән яраланучылар һәм корбаннар булмаган", диелә. Шура әгъзалары хәрби көч куллануның вазгыятьне тагын да начарайтачагы, кеше хокуклары бозылуның нык артачагы турында кисәтә. Шураның 25ләп әгъзасы кул куйган мөрәҗәгатькә имзалар җыю дәвам итә.

Атна ахырында дөньяның төрле илләре башкалаларындагы Русия илчелекләре янында президент Владимир Путинны Украинага каршы сугыш башлаудан тыелып калырга өндәүче урам җыеннары үтте. Чехия башкаласы Прагада шимбә һәм якшәмбе көнне узган шундый чараларда Мәскәүнең 1968 елда Чехословакиягә гаскәрләр кертеп демократик реформаларны бастыруын искә алдылар һәм Путинның хәзерге гамәлләрен шул хәлләргә охшаттылар.

ХАРЬКОВТАГЫ КЫЙНАУЛАР ВИДЕОСЫ ПРОКУРАТУРАГА БИРЕЛӘ АЛА -- Харьковта шимбә көнне Украинаның яңа хакимиятен яклаучыларны кыйнаучылар мәхкәмә каршына басарга мөмкин. Яңа хакимият тарафдарларын кыйнау, мыскыллауларның бер өлеше видеога төшереп алынган һәм анда күпсанлы кешеләрнең берәм-берәм корридор аша үткәрелүчеләрне кыйнавы сурәтләнә. Бу видео прокуратура тикшерүендә дәлил буларак кулланыла ала. Милиция йөздән артык кешенең авыр хәлдә хастаханәгә китерелүен хәбәр итә.

КЫРЫМТАТАРЛАР УКРАИНА ХӘРБИЛӘРЕН ЯКЛЫЙ -- Керчта Украина хәрби-диңгез флоты хезмәткәрләрен якларга бер меңләп кырымтатар килгән. Украина саклану министрлыгы белдерүенчә, якшәмбе көнне Русиянең кораллы хәрбиләре Украинаның Кырымдагы бу бүлегенә дә килгән. Шуннан соң күп тә үтмәстән кырымтатарлар килеп Украин хәрбиләре белән Русия кораллы көчләре арасына баскан. Украина саклану министрлыгының матбугат хезмәте белдерүенчә, "шул рәвешле кырымтатарлар Русия хәрбиләре ягыннан провокацияләргә, канунсыз гамәлләргә чик куярга тырыша".

ТАТАРСТАН МӨФТИЕ КЫРЫМГА ТАНЫШЫРГА КИЛГӘН -- Татарстан мөселманнары диния идарәсе рәисе Камил Сәмигуллин катнашындагы төркем Акмәчеттә Кырымтатар мәҗлесе җитәкчелеге белән очрашты. Камил хәзрәт Азатлык сорауларына җавап биреп, бу сәфәрне "танышу" сәфәре дип атады, иртәрәк килә алмадык, диде.

"АКЫЛГА СЫЙМАСЛЫК АГРЕССИЯ" -- АКШ дәүләт секретаре Джон Керри Русиянең Украинадагы гамәлләрен "акылга сыймаслык агрессия" дип атады һәм аны кичекмәстән туктатырга чакырды. Керри Русиягә "илне икътисади изоляциядә калдырачак" чикләүләр белән янады. /AP, Reuters/