Украинадагы атышларны туктату килешүенә ирешелүе хәбәр ителә
Минскида контакт төркеме очрашуында Украина белән Луһански һәм Донецки сепаратистлары арасында атышларны туктату килешүе имзаланган. Бу турыда әлеге сөйләшүләргә якын булган бер чыганакка таянып Интерфакс-Украина агентлыгы хәбәр итә.
Атышларның җомга көнне кичке сәгать алтыда (Казан вакыты белән җидедә) туктатылачагы әйтелә.
Протокол атышларның туктату режимын күзәтүне, әсирләрне алмашуны һәм башка мәсьәләрне үз өченә алган 14 бүлектән тора.
France Press агентлыгы хәбәр итүенчә, Украина премьер-министры Арсений Яценюк бу килешү гамәлгә ашырылсын өчен аның Европа берлеге белән Кушма Штатлар тарафыннан да хуплануы зарур диде.
3 сентябрьдә Украина һәм Русия президентлары Петр Порошенко белән Владимир Путин Украинаның көнчыгышында 2600-дән артык кешенең гомерен өзгән сугышны туктату юллары турында телефон аша сөйләшкән иде.
Украина үтерелгән Русия хәрбиләре санының ике меңгә җитүен белдерә
Украина Донбасстагы сугышта үтерелгән Русия хәрбиләре санының ике меңгә җитүен хәбәр итә. Бу турыда, күзләү мәгълүматларына таянып, Милли иминлек һәм саклану шурасы башлыгы Андрей Лысенко Reuters агентлыгына белдерде.
Лысенко әйтүенчә, Русия кораллы көчләре сугышу мөмкинлекләре кимегән хәрби бүлекләрне ротация нигезендә алыштырып тора.
Валентина Матвиенко: Русиядән Украинага сугышырга китүчеләр арта
Русиянең Федерация шурасы рәисәсе Валентина Матвиенко Русиядән Украинага каршы сугышка китүчеләрнең саны арта баруын таныды. Ул бу турыда Донбасста һәлак булган фотохәбәрче Андрей Стенинның җеназасында чыгыш ясаганда әйтте.
"Без үз хокуклары, гаделлек, тугандаш халык җирендә тынычлык өчен батырларча сугышучылар арасында Русиядән килгән ихтыяриларның арта баруын күрәбез", диде Матвиенко.
Матвиенко Украинага сугышка баручыларның каян корал алуы һәм Русия чик сакчылары аша Украинага ничек узуы турында берни дә әйтмәде.
Моңарчы Русия хакимиятләре Украинага каршы сугышта Русия хәрбиләренең катнашуын кискен кире кагып килә иде.
Харьковта Путин "женазасы"
4 сентябрь Украинаның Харьков шәһәрендә демонстрантлар Владимира Путинның символик женазасын оештырды. Алар Путин карачкысын табутка салып Русия консуллыгы яныннан узды. Украинаның көнчыгышында Русия тарафлы сепаратистлар белән апрель аеннан бирле барган бәрелешләрдә 2600лап кеше һәлак булды.
Мариуполь тирәсендә бәрелешләр дәвам итә
Украина мәгълүмат чаралары белдерүенчә, илнең көньяк-көнчыгышындагы Мариуполь шәһәре тирәсендә сугыш дәвам итә. Бүген иртән снарядлар белән утка тоту тавышлары ишетелгән. "Азов" батальоны матбугат хезмәте, сугыш шәһәрдән 10-15 чакрым ераклыкта бара, Мариупольгә куркынычы юк дип белдерә. дәвәм
Мариупольдә сугышка каршы чарада меңнәрчә кеше катнашты
4 сентябрь Украинаның Мариуполь шәһәрендә биш меңләп кеше үзәк мәйданга чыгып "Украинага дан! Каһарманнарга дан!" дигән шигарләр кычкырды, украин гимнын җырлады.
Сепаратистлар Мариупольгә һөҗүм итеп карады
Русия армиясе ярдәмендә көчәеп китеп Украина хәрбиләрен чигенүләргә дучар иткән сепаратистлар соңгы айларда Донецки өлкәсенең административ үзәге булган Мариуполь шәһәренә һөҗүм башлады.
Берничә данә танк һәм хәрби техника катнашкан һөҗүмне Украина хәрбиләре һәм аларга ярдәм итүче шәһәр кешеләре кире кайтарган. Берничә танк сафтан чыгарылган.
Хәрбиләр моны Мәскәү яклы сугышчыларның чын һөҗүме түгел, ә украиннарның ныклыгын һәм ничек урнашуын тикшерү максатындагы бер чара дип санауларын белдерде.
Бер атна каты бәрелешләрдән соң Украина гвардиясе көчләре Луһански янындагы Новосвитливка авылын Русия яклы сепаратистларга калдырып китте. Хәбәрчебез Андрей Бабицкий 3 сентябрь төшергән видеода җимерелгән мәктәп һәм авыл тирәсендә ташланган хәрби техника калыдыклары күренә.