Әсәр шәһри Болгардагы Кара Пулатның төзек хәле белән башланып китә. Опера XIV гасырда Болгарда барган вакыйгаларга нигезләнә.
Сәхнәдә башта Болгардагы тыныч тормыш, аннан Болгар дәүләтенә дошман һөҗүме, дошман хәрбиләренең Болгар ханы кызын кулга алырга теләүләре, хан кызының сөйгәненнән бу кызның кайда һәм кем булуын белү өчен сорау алу һәм ахырда аны асып үтерү, ә иң азактан исә араларында хан кызы да булган унике кызны тереләй Кара Пулатта яндыру тасвирлана.
Операның либретто авторы Ренат Харис әйтүенчә, спектакльнең мәгънәсе зур һәм тирән.
"Бу спектакль-операны тамашачы үзе карарга тиеш һәм бу спектакль белән авторлар халыкка ни әйтергә теләгәнен тамашачылар үзләре эзләп табырга тиеш. Хис белән уй бергә кушылып кешенең күңелендә нәрсә калыр мин ансын әйтә алмыйм. Әмма минем тамашачыга, дөньяда кешене кеше итә торган иң зур көч - ул мәхәббәт, мәхәббәттә тугрылык, туган илгә тугрылык, бер-береңә, дусларыңа тугрылык дигән фикерне җиткерәсем килде. Безгә шушы хисләрне сакларга кирәк. Шул очракта гына туган илгә, туган халкыңа, якыннарыңа игелек китерә ала торган кеше булып була", дип белдерде ул.
Аның сүзләренчә, бу спектакль-операның барлыкка килүендә Татарстанның беренче президенты Миңтимер Шәймиевнең роле бик зур булган.
"Ул минем идеяны бер тыңлауда хуплады, үзенең йөрәгенә күчерде һәм бу әсәрнең барлыкка килүенә фикерләре белән дә, матди яктан да зур өлеш кертте. Матди як дигәннән бу әсәр, минем белүемчә, тугыз миллион сумнан артыкка төште", дип белдерде Ренат Харис Азатлык сорауларын җаваплап.
Спектакль-операның режиссеры Георгий Ковтун, композиторы Эльмир Низамов.
Әсәр, үзенең эчтәлеге, тарихи вакыйгаларны аңлатырга тырышуы, сәхнәдә яктылыкның төрлечә чагылдырылуы, костюмнарның зәвыклыгы белән тамашачының күңеленә бик хуш килде. Тинчурин тамашачысы 1 сәгать 15 минут тәнәфессез барган спектакль-опера тәмамлангач, артистларга көчле алкышлары белән үз рәхмәтен җиткерде.
