Пакстанда кечкенә малай зур ифтар мәҗлесен әзерли
Әҗем мәчетендә намазны тиз тоталар, Әмәттә иркенләп утыралар: тәравих сәяхәтләре
Быел рамазан ае ничектер тизрәк килеп җиткәндәй тоелды. Минем өчен быелгы рамазанның яңалыгы – ул аның эш вакытына туры килүе. Моңа кадәр тоткан уразалар һәрчак ял вакытында уза иде. Шулай да, бик ардырмый. Әмма бераз салкын булуы сиздерә.
Беренче тәравихка дустым Нигина белән бардым. Нигина узган ел тәравихка көн дә Казандагы төрле мәчетләрдә йөреп, “Тәравих сәяхәтләре” исемле төркемдә һәр мәчет турында мәгълүмат бирә иде. Шуңа күрә ул кайсы мәчеттә тәравихның ничек укылуын, нинди халык йөрүен чамалый. Аның киңәше белән Әҗем мәчетенә киттек. Намазны тиз тоталар монда. Эш кешесе өчен бу мөһим, чөнки әле өйгә кайтып, сәхәрне ашыйсы, йокы туйдырып, иртән эшкә барасы да бар бит. Икенче көн Әмәт мәчетенә бардык. Биредә күпчелекне өлкәннәр тәшкил итә. Бәлки бу шулай ук намазның озак укылуы белән дә бәйледер... Менә шундый күзәтүләр.
Рамазан аенда Татарстан мөселманнар өчен уңай өлкә булуына тагын бер кат инанасың. Ифтар вакыты җитүен хәбәр итеп, “Тәртип фм”да азан әйтелә. Соңыннан дога укыйлар, Җәлил хәзрәт вәгазь сөйли, мөнәҗәтләр, дини эчтәлекле җырлар җырлана... Иртәнге якта да нәкъ шулай. Авыз ачу урынын да сайлау иреге бар: көн дә төрләндерәбез. Кыскасы, Аллага шөкер!
Эльза Нәбиуллина, Казан
"Төрекләр яхшы халык инде алар"
Быел беренче тапкыр уразаны чит илдә тотарга насыйп булды. Мин Венада - бер атналык эш сәфәрендә. Монда кояш иртәнге сәгать 5 тулганда чыга, кичке сәгать 9 тулганда бата. Ураза җиңел генә башланып китте. Ләкин икенче көнне төштән соң баш бик каты авыртты. Күрәсең, организм күнегеп килә. Беренче өч көн иң авыры диләр бит. Ел саен шуңа инанам. Ифтарга мин яши торган кунакханә төбендә генә урнашкан төрек кафесына хәләл гамбургер алырга дип кергән идем, хуҗасы ураза тотканымны белгәч, калырга үгетләде. Нәтиҗәдә берничә көн ит ашамаганнан соң, ниһаять, итле ризык тәтеде. Саллы гына ташлама да ясады. Төрекләр яхшы халык инде алар...
Рөстәм Галиев, Әлмәт
Ифтарга юл
Канада премьер-министры үзенең Либерал партиясендәге хезмәттәшләре белән ифтар мәҗлесендә. Дөньяда 90% мөселманнар яшәгән кайсы илдә зур ифтар мәҗлесләре тыелган?
Ураза тотучыларның күңелен сүрелдермәү кирәк
Кичә бик матур авыз ачу булды минем. Шамил Аляутдинов өйрәткәнчә, лимонлы су эчеп финик кабып авыз ачтым. (Шамил хәзрәт күп хәрәкәтләнергә куша. Аны тыңлап, иртән 45 минут җәяү, 45 минут кире юлны да тәпи-тәпи уздырып канны кыздырып җибәрәм)
Намаз кылганнан соң яшелчәләрдән салат, сырлы йомырка табәсе ясадым, янына катык салдым да җиде катлы йортның түбәсендәге террасага чыктым. Төрле төсләр белән кояш баю, нечкә генә айның һава диңгезендә йөзү манзарасын исем китеп карап тордым.
Беренче уразамны мәктәптә укыганда тотып караган идем, кышка туры килде ул. Әллә гыйнвар, әллә декабрь ае иде, төгәл белмим. Дөм караңгыда майлы коймак, җимешләр белән чәй эчкәнем хәтердә. Үзем йокымсырап утырам, ашыйсы да килми. Әни дә, бездә кунакта булган әбинең дә: “Сәхәр ашау – савап” дип әйткән сүзләре хәтергә уелып калган. Аннары рамазанның башында өч , уртасында өч, изге айның соңгы өч көнен ураза тотсаң, тулы бер ай булып санала дип әйтеп, ураза тотарга кызыктыралар иде. Студент вакытта да тотарга тырыша идек, анда белер-белмәс тотканбыз инде, никтер кояш чыгуга ике сәгать алдан сәхәр тәмамланырга тиеш булганны онытып җибәргәнбез. Әмма бөтен бүлмә кызлары белән шулкадәр ихласлык белән тоттык без ул уразаны, әле дә сагынам ул вакытларны.
Ураза тотуын тотасың да ул, әмма намаз укымыйсың икән, ул кабул булмый дип әйтеп күңелне сүрелдергән кешеләр дә күп булды. Кичә дә туганнар белән аралашканда намаз укымагач, ач тору гына була дигән фикер ычкындырдылар. Белмим, намаз үзенә, ураза үзенә бер зур әйбер бугай ул. Миндә, мисал өчен, ураза тота башлау белән исламга якынаю булган. Шуңа күрә рамазанда уразаны намаз укымаган килеш тә тотып карау – зур бер гамәл. Башта уразасын тотып карый кеше, аннары ул алга таба бара.
Римма Бикмөхәммәтова
Чаллы халкы ураза турында нәрсә белә?
Азатлык Чаллы урамнарында очраган кешеләрдән ураза турында сорады. Мәктәптә укучы Алинә белән Илдар ураза тоту тәртипләрен белә, алардан олырак яшьләр бик таныш түгел икән.
Кытайның Синҗан төбәгендәге Аксу шәһәрендә уйгыр ханымы лагман ясый