Авылда маллар гына ураза тотмый
Әз генә җил исеп куйса да “Аллаһ көнен бирде, шөкер”, дип кабатлый әниебез. Әтиебез “Дәръяларга төшеп ятар идем”, дип печәннән кайтa. Эссе көннәр булды шул Рамазанның. Уразаны кем ничек уздыра. Кондиционер астында офиста утыручыныкы да, көндез йоклап, төнлә яшәүче гарәпләрнеке дә, таңнан торып ахшамгача каралты-кураны караучы 60тан узган әтием белән әниемнеке дә уза.
Авылда тормыш иртә башлана. Иртәнге 7 дә әнинең чебиләргә дип бакча артыннан җыеп алып кайткан кычыткан чапканы ишетелә. Авылда кош-кортсыз да булмый, ашарга ит дип чебиләр үстерелә, тырышып йомырка салучы тавыклар да тәрбияләнә, оныкларга файдалы сөт булсын дип савым кәҗәләрен дә, сыерын да асырыйлар. Бакчасына да өлгерәсе! Андагы эшнең дә бер бетәсе түгел. 15 сутыйлык бәрәңге бакчасы бар. Ул “плантациядә” бил бөкмәсәң, алабутасы басып алырга, колорадо коңгызы һөҗүм итәргә әзер тора. Урман җиләге дә өлгерде, Ходай биргән нигъмәтне ничек җыймыйсың дип фикер йөртә авыл кешесе. Ураза тотучы әби белән бабайга күпме мәшәкать!
Урман, кыр-боланнарда йөреп аңкау аңкауга ябышкач өйгә кайталар үзләре , әмма анда инде аларны чираттагы “вахта” көтеп тора. Йорттагы маллар бит уразада түгел, аларны ашатасы, тәрбиялисе бар.
Сәхәр вакыты. Бик тыныч һәм рәхәт. Әти-әни кара-каршы чәй эчә. “Гыйбадәткә вакытым калмый”, дип әйтеп куя әни. Гәрчә сәхәрдән соң Коръән укырга өлгерә, озаклап дога да кылырга тырыша. Аңа кушылып “Ярый әле мәчеттә тәрәвих укыйм”, дип әтием үзен дә, әниемне дә тынычландыра. Әти белән әнинең үзара сөйләшүен тыңлау, бер-берсенә игътибарлы булуын күрү үзе бер ләззәт. Аллаh тигезлекләреннән аермасын!
Сөмбел Вәлиди, Казан
Рамазан рекламы
Рамазан ае уңаеннан төрле кызыклы һәм матур рекламнар карарга тәкъдим итәбез!
АКШта мөселман булмаучылар да безнеңчә сәлам бирә
Без Оһайо штатының Коламбус шәһәрендә инде икенче Рамазанны уздырабыз. Биредә мөселманнар бар, башлыча төрекләр, пакытстаннар, гарәпләр. Атна саен гаилә белән мәчет ифтарына барырга тырышабыз. Гыйбадәтханәләрдә авыз ачулар көн саен уза. Кайда барырга икәнне һәр кеше үзе хәл итә, без төрекләргә барырга яратабыз. Үткеррәк ризыклар ашарга теләүчеләр булса, пакыстанларга рәхим итә.
Студентлар өчен Рамазан – җәннәт ае. Алар ифтарга әзерләнгән мул табыннан рәхәтләнә! Нәрсә яшерергә, акча ягы такыррак бит, үзебез дә шундый идек. Көне буе ашамыйсың, аннары кич бушка ашыйсың. Әле сәхәргә дә күчтәнәч итеп кыстырып алып китәргә мөмкин. Акчаны экономияләүнең иң яхшы ысулы.
АКШ мәчетләрендә, мәдәни үзәкләрендә оештырган ифтарларга дус булган американнарны да, күршеләрне дә, дусларны да дәшергә була. Бу хуплана гына, чөнки бу рәвешле аларга исламны аңлатып була. Без йөргән ифтар җирендә төрек хатыннары төркем булып оешып, чиркәүләргә барып төрле дин вәкилләре белән аралашу чараларын уздыра. Рамазан аенда чиркәүләрдә ифтар ясыйлар. Исламнан хәбәрдар булмаган кеше исламнан курка. Монда да медиа корбаннары булганнары бар. Чиркәү кешеләре мөселманнар белән якынрак танышырга тели.
Менә Айдаһо штатында яшәдек, анда мөселманнар бик аз иде. Ифтарга өйгә күршелерне, дусларны чакыра идек. Американнар үзләре йокларга иртә ята. Алар өчен кичке 9 да ашка чакыру бик сәер тоела. Сәгать 10да инде алар әллүр була. Әмма чакыргач, бик кызыгалар, киләселәре килә. Икеләнәләр. Көндез “тихий час” ясап килегез, дигәч, “Шәп идея!” дип куанышалар.
Американнар – бик шат күңелле кешеләр, алар кунакка зур тантанага килгән кебек киләләр, сөенә беләләр, гаеп эзләмиләр. Төрле сораулар биреп төпченәләр, бер тамчы су да эчмисезме, ашамыйсызмы дип шаккатталар, уйга батып утыралар. Безнең белән рәттән бөтен кагыйдәләрне үтәргә тырышалар. “О, финик кабарга кирәкме?” диләр дә безне кабатлап авыз ачалар. Табын артында сыйлану, аралашу төнгә кадәр дәвам итәргә мөмкин. Алар ислам турында шулкадәр күп инфо ала, рәхмәтле булып саубуллашып китәләр.
Әлеге вакытта сәхәрне иртәнге 4.25 тә тәмамлыйбыз, авыз ачу исә кичке 9да. АКШның көньягына таба көн кыскарак. Быел Рамазанда балалар белән Яңа Орлеанга да бардык. Ирем эш буенча барды да безне дә бер уңайдан ияртте. Анда бик эссе, дымлы. Кояш кичке 8дә үк байый башлый. Анда да кызыклар күп булды. Ресторан яки кафега килеп керүебез була, безне мөселманнар икәнен күреп авыз тутырып “Әссәләмәгаләйкүм!” дип каршы алалар. Гәрчә үзләре мөселман түгел. Хәләл меню бармы дип сорыйсы да түгел, официант дистәдән артык төрле вегетариан ризыкларын тәкъдим итә, “Happy Ramadan!” дип теләк телиләр. Башка кафеларга керсәң дә, инглизчә “Рамазан мөбәрәк булсын!” яки ураза тотучыларга бушка ризык тәкъдим иткән язулар күрергә була.
Коламбус шәһәрендәге мәчет иң кыйммәтле һәм кәттә районнарның берсендә урнашкан, Анда күпчелек мөселманнар яши. Ниндидер торак сатуга чыккан дисәләр, шунда ук башка мөселман сатып ала. Бөтенесенең мәчет тирәсендә яшисе килә, шуңа мәхәллә дә үсә.
Рамазанның бәрәкәтен Казанда да тоярбыз Алла бирса. Татарстанга билетлар алынган, юлга чыгабыз. Шатлыклы, сөенечле очрашуларны көтеп, күзаллау күңелләрне кытыклап тора. Туган якларда да ураза тотарга насыйп булсын!
Диләрә Хафизова, Оһайо штаты, Коламбус шәһәре
Татар яшьләре форумы ачык һавада ифтар пикнигы үткәрде
24 июнь Казанда Бөтендөнья татар яшьләре форумы ачык һавада ифтар пикнигы үткәрде. Оештыручылар әйтүенчә, анда йөзгә якын кеше катнашкан.
Казанда ачык һавада яшьләр ифтары
Рамазанның соңгы 10 көне дә килеп җитте. Исегезгә төшерәбез, Исламда бу көннәр иң әһәмиятле булып санала. Соңгы 10 төн арасында "төннәр солтаны" булган Кадер кичәсе дә бар.
"I-mufti" журналистлар белән авыз ачты
"I-mufti", "Әй мөфти" дип Татарстан мөфтие Камил Сәмигуллинны "Татар-информ" агентлыгың яңа җитәкче Шамил Садыйков атады. Ул мөфтинең интернеттагы активлыгын хуплады һәм бу юнәлешне дәвам итүен теләде.
"Ватаным Татарстан" газеты журналисты Рәшит Минһаҗ дин әһелләренә турыдан язып торуның бик ошап та бетмәвен искә алды. "Татарстан-Яңа Гасыр" телеканалы Айзат Шәймәрдәнов үз чыгышында мөфтигә мөрәҗәгать итеп дин әһелләренең нинди генә тема булмасын журналистларга ачык булулары кирәклеген әйтте.
Чулпанга Рамазан лайв блогы ярдәм иткән
Рамазан турындагы лайв блогны күпләр укыйлар икән! Бик күптәннән Иран профессоры белән элемтәгә керү чарасын эзләдем, интернетта юк, телефон да, электрон почта адресын да сорап карадым, әмма ул интервью биргән редакцияләрдә минем соравыма колак салучы булмады. Бик борчылган идем, ничек табарга соң дип баш вата идем. Азатлыкка Рамазан ае турында язган идем, аны социаль челтәрләрдә “ошый” дип билгеләүчеләр арасында профессор белән әңгәмә ясаган журналист та бар икән. Күреп алдым да шунда ук профессорның контактларын сорап аңа яздым. Ярдәм итте. Ул миңа: “Хатыным да – сезнең кебек декреттагы аспирант. Халәтегезне бик анлыйм, шуна булышырга булдым”, дип әйтте.
Чулпан Хәмидова
Америка татарларының ифтар менюсы