Пакстанда бала мәчеттә Коръән укый
Мордовиянең Аксеново авылында ифтарга әзерлек
Мурманскида озын поляр көннәр
Минем инде моңа кадәр дә Мурманск шәһәрендә Рамазан аенда булганым бар иде, әмма уразаны тулысынча биредә тотуым беренче тапкыр.
Монда хәзер поляр көннәр булуына карамастан, ураза вакытының озынлыгы Казан белән чагыштырганда әллә ни аерылмый, бераз кыскарак та әле. Бүген, мәсәлән, 18 сәгать тә 12 минут, югыйсә көн озынлынлыгы 24 сәгать. Шунысы кызык: тышта кояш, якты көн, ә өйдә - ифтар. Әмма, шулай да, ифтар вакытын көн караңгылануы белән бергә көтү гадәтем беркая да китмәгән, үзем белән.
"Төннәрен" бөтенләй йоклыйсы килми, шуңа да сәхәрне каршылау җиңел. Ә шулай да балачакта, шәм яктысында (авылда кайчак ут сүнгәли иде) үткәргән сәхәрләр сагындыра.
Тәравих намазын мөселманнар әлеге вакытта Мурманск шәһәренең бердәнбер мәчетендә укый. Аллаһ йорты манарасыз. Әлегә дип ышанасы килә. Биредә һәркөн ифтарлар үткәрелә. Монда, гомумән, төрле милләт мөселманнары җыелу сәбәпле, ифтар ашлары да төрледән-төрле һәм бик тәмле була (гадәттә, мөселманнар өйдән үзләре белән милли тәм-томнарын пешереп алып килә).
Сан ягыннан кимрәк булсалар да, гореф-гадәтләре белән нык аерылсалар да, бу якларда мөселманнар бик тату, дус, шунысы ошый. Бәлки, шуңа да биредә ифтар кояшлы гына түгел, ә нурлы да.
Рания Җиһаншина, Мурманск
Рамазан - догалар кабул булган ай
Рамазан ае - минем иң яраткан чагым. Аның аеруча җәй көненә туры килүе дә күңелгә рәхәтлек өсти. Әйе, озын көнне ураза тоту авыр анысы, тик андый уразаның савабы да зуррак була диләр. Ә кичләр һәм төннәр шулкадәр бәрәктле, күңелдә бу нигъмәтләрне югалтып калу куркынычы гына урнаша.
Авыз ачкан мөселман кешесенең догалары кабул була. Шуңа күрә беренче йотым су ясаганнан соң куллар күтәрелә, Раббыбыздан күңелләргә иман нуры, барлык кешеләргә тәүфикъ-һидаять, милләтебезгә, өммәтебезгә көч-кодрәт, илләргә тынычлык сорала. Шуннан соң ахшам намазына керешү, һәм соңыннан гына ризык хакын биреп, тәмләп ифтарлар кылу. Шөкер, Казаныбызда авыз ачу өчен урыннар күп, туган-тумачадан тыш хәләл кафе-рестораннар күп, матди мөмкинлеге булмаган мөеминнәр өчен Рамазан чатырлары эшли.
Авыз ачудан соң озак утырып та булмый. Кичке уннарда мәчетләрдә тәравих намазын укый башлыйлар. Аһ, нинди рәхәт ул кичке Казан буйлап мәчеткә ашыгу! Күңел тыныч, рәхәт, шәһәр урамнары буш диярлек. Мәчеттән чыккач тагын да рәхәтрәк, чөнки вазифаңны үтәп чыгасың. Ләкин иркен йөрергә вакыт юк, сәхәр әзерлисе бар... Сәхәрдән соң исә иртәнге намазны укып, тыныч кына йоклап та була.
Менә шулай бәрәкәтле итеп уза Казан уразалары. Барыгызга да бу бәрәкәткә ирешергә насыйп булсын!
Мансур Салихов, Казан
Оманның Маскат шәһәрендә авыз ачулар урамда уза. Тоткан уразалырыгыз кабул булсын!
Казанның Тынычлык бистәсендә "Рамазан хәзинәсе" эшли башлаган
Махсус суыткычларга теләгән кеше ризык китереп куя ала. Мохтаҗ кешеләр аны куллана ала. Бу акцияне Тынычлык бистәсендәге мөселманнар оештырган.
- By фәнис фәтхи
Уфа ифтарларында мөнәҗәтләр әйтелә
Рамазан аенда Башкортстан мәчетләрендә быел ифтар мәҗлесләре оештыручылар артты. Уфа мәчетләрендә үтүче авыз ачу мәҗлесләрен күпчелеген хәлле эшкуарлар финанслый, кайберләренең чыгымнарын дин әһелләре бергәләшеп тә күтәрә.
Уфаның “Ихлас” мәчетендә 18 июнь көнне өченче ифтар мәҗлесе узды. Аны республика “Ак калфак” татар хатын-кызлары оешмасы рәисәсе Люция Вафина оештырды. Гадәттә, мәчетнең ифтарына мөселманнар авыз ачуга бер сәгать кала җыела башлый, кичке ун тулганда азан әйтелә, аннан соң ир-атлар Аллаһ йортының беренче катында, хатын-кызлар икенче катта намаз укый. Ифтар мәҗлесе исә мәчет ишегалдында күптән түгел ачылган “Ихлас” кафесенда уза. Җәмгысе йөзгә якын дин кардәшләрне сыйдырышлы ашханәнең барлык өстәлләре дә кунакларны кабул итә ала.
Мәчетнең имам-хатыйбы Мөхәммәт хәзрәт Галләмов һәр чараны тирән мәгънәле, эчтәлекле оештыра. Бу кичә дә искәрмә түгел. Матур вәгазьләрен дә сөйләде, башка кунакларга да сүз бирде ул. Ә җырчы һәм музыкант Радик Динәхмәтов мөнәҗәт башкарды һәм кунакларга иң ихлас теләкләрен җиткерде. Ифтардан соң байтак кеше мәчеткә кереп тәравих намазын да укыды.
Ифтар мәҗлесләре Уфаның башка мәчетләрендә, шул исәптән “Лалә-Тюльпан”да, Тукай урамындагы борынгы Җәмигъ мәчеттә, “Гуфран”, “Мәдинә” мәчетләрендә дә оештырыла. Тукай урамындагы мәчеттән Әбдерәшит хәзрәт әйтүенчә, биредә ифтар мәҗлесләре көн аралаш диярлек уздырыла. Алты чатырда йөз-йөз егерме кеше кунак ителә. Мәҗлесләрен әзерләүне үз карамагына алуны хәлле милләттәшләр алдан ук әйтеп куеп тәгаен көннәрен билгели.
Бүген - иң озын көн һәм иң кыска төн. Ураза да үзенең "экваторы"на җитте