Meta (Facebook, Instagram) ширкәте Русиядә экстремистик дип танылганнан соң, Уфадагы Ашан кибете идарәсе кисәтү язулары урнаштырган.
Кибет кисәтүенчә, тыелган социаль челтәрләр тамгасы куелган товар алар тыела башлаганчы җитештерелгән һәм экстремизм пропагандасы булып тормый. Бу хакта Mkset.ru Телеграм каналы яза.
Киевтан төньяк-көнбатышка таба урнашкан Буча шәһәрендә дистәләрчә, бәлки йөзләрчә тыныч халык үтерелгән. Шәһәрне айдан артык Русия хәрбиләре биләп торды.
Украина хәрбиләре шәһәрне бу көннәрдә Русия армиясе төньякка, беларус чигенә кискен чигенгәннән соң алдылар. Социаль челтәрләрдә фото һәм видеолар күренә башлады, аларда кайбер урамнарның мәетләр белән капланганы күренә.
Шимбә көнне шәһәрдә чит ил корреспондентлары, шул исәптән Reuters һәм AFP хәбәрчеләре булды. Үз репортажларында алар урамнарда күп кеше гәүдәсе ятуын раслый.
Күрәсең, сүз гражданнар киемендәге тыныч халык вәкилләре турында бара, кайберләрен инде танышлары таныган. Аларның бер өлеше атулар вакытында һәлак булган яки миналарда шартлаган булса кирәк. Әмма фотода куллары бәйләнгән кеше гәүдәләре дә бар. Украина президенты офисы киңәшчесе Михаил Подоляк аларны Русия хәрбиләре атып үтергән, дип фаразлый.
Шәһәр мэры сүзләренчә, Буча шәһәренең 300гә якын кешесе туганнар каберлегенә җирләнгән.
Русия саклану министрлыгы Reuters җибәргән сорауга җавап бирмәгән.
Мариупольда Литваның документаль фильмнар төшерүче режиссеры Мантас Кведаравичюс һәлак булган. Сугыш барган шәһәрдә ул күргәннәрне төшереп йөргән.
Кведаравичюсның соңгы фильмнарының берсе "Мариуполис" хәзерге вакытта каты бәрелешләр барган Мариуполь шәһәренә багышланды. Әлеге фильмда сәясәт бөтенләй диярлек юк иде: бары 9 май бәйрәменә багышланган бер күренештә Георгий тасмалары тагып чыккан Русия тарафдарлары белән украин символы белән чыгучылар арасындагы бәхәс күрсәтелде.
Кведаравичюс шулай ук Кадыров Чечнясы турында төшерелгән "Барзах" документаль фильмы авторы, режиссер аны яшерен рәвештә төшергән иде.
Азәрбайҗан башкаласы Баку шәһәре үзәгендә төнге клубтагы шартлауда ким дигәндә бер кеше үлгән, 31 кеше төрле дәрәҗәдәге җәрәхәтләр алган. Клубта газ балоны шартлаган дип фаразлана.
Казан супермаркетларының берсендә сугышка каршы булган активистлар кайбер азык-төлекнең язуларын алыштырганы әйтелә. Бу хакта Sota Телеграм каналы яза. Мисал өчен кәһвәнең 400 сумлык бәясе янына "Русия армиясе Мариупольдәге сәнгать мәктәбен бомбага тотты. Анда якынча 400 кеше атышлардан качкан булган" диелгән.
2 апрельдә Татарстанда тагын өч хәрби җирләнде. Алар Украинадагы сугышта һәлак булган.
- Андрей Кульметьев - Норлат районының Кече Камышлы авылында туган, Нурлаттагы Советлар берлеше каһарманы М.Е.Сергеев исемендәге гимназиядә укыган, Русия кооперация университеты тәмамлаган. 24 яшь булган. Контракт нигезендә хезмәт иткән. Үлеме турында Нурлат-информ хәбәр итте.
- Алмаз Батанов - Казанда туган, аннары гаиләсе белән Когалым шәһәренә күченгән, анда урта мәктәпне тәмамлаган. Казан танк училищесын тәмамлаган. Украинадагы сугышта 13 мартта һәлак булган. Казанның Самосырово зиратында җирләнде. Үлемен "Кайбыч таңннары" газеты хәбәр итте.
- Данил Казаков - Бөгелмәдә 2001 елда туган. 2015 елда мәктәпне, аннан соң Бөгелмә машина төзелеше техникумын тәмамлаган. 2021 елның июленнән контракт нигезендә хезмәт иткән диелә.
Литва Русия газыннан баш тарту турында белдерде.
"Газпром"нан газ алган Европа берлеге илләре арасында без беренчеләрдән булып Русия газыннан бәйсез булуга ирештек, һәм бу эзлекле энергетика сәясәте һәм вакытында кабул ителгән инфраструктур карарлар нәтиҗәсе", диде Литва энергетика министры Дайнюс Крейвис.
CIT: Белгородта шартлаган ракет Русиядән килгән
Conflict Intelligence Team (CIT) төркеме раславынча, алар ракетның килеп төшкән урынын билгели алган һәм снарядның көнчыгыштан яки төньяк-көнчыгыштан, ягъни Русия җирлегеннән килүен ачыклый алган.
Моннан тыш, CIT моны канатлы ракет дип саный, ә андый ракетларны украин гаскәре кулланмый.
Тикшерүне уздыручылар Русия ягыннан ракет җибәрү алдан уйланылган провокация дип уйламый. Ракет ялгыш килеп эләккәндер дип фаразлыйлар.