Европа берлеге Русиягә каршы санкцияләрнең алтынчы пакетын әзерли башлый
Яңа чикләүләр Русиянең Украинага һөҗүме сәбәпле кертелә. Яңа санкцияләр турында фикер алыша башлау турында Дания һәм Литва чит эшләр министрлыклары белдерде.
Литва чит эшләр министры Габриэлюс Ландсбергис бу санкцияләр "нефть опциясе" белән әзерләнә, "бу юлы килеп чыгачак дип өметләнәм" диде. Сугыш башланганнан бирле кайбер Европа илләре Русиядән нефть һәм газ сатып алуны туктатырга өнди.
Зеленский: Мариупольдә дистәләрчә мең кеше һәлак булган
Украина президенты Владимир Зеленский Русия яулап алырга омтылган Мариуполь шәһәрендә сугыш дәвамында дистәләрчә мең кеше һәлак булуын белдерде. Русия яңа һөҗүм өчен тагын дистәләрчә мең хәрбине китертә, диде ул.
Русия гаскәре Мариупольне март башында камап алган. Март уртасында шәһәр хакимияте аның 80-90 процентка җимерелгәнен һәм һәлак булучылар санын меңнәрчә кеше дип әйткән иде.
Европа берлеге Русиягә карата нефть эмбаргосы әзерли
Ирландия тышкы эшләр министры Саймон Ковни, Мәскәүнең Украинага һөҗүменә җавап итеп, Европа комиссиясе Русиягә карата кертелергә мөмкин яңа чикләүләрнең бер өлеше буларак, нефть эмбаргосын да җентекләп өйрәнә диде. Аның сүзләренчә, әлегә тәгаен карар юк.
Мәскәү биржасы ачылганда доллар курсы 6 сумга (7,9 процентка) артып, 82,095 сумга җитте. Соңрак АКШ акчасы үсеше кимеде, ул 79 сумга төште. Евро – 6,1 сумга күтәрелде һәм 88,75 сумга җитте. Юань – 63 тиенгә арткан. Рубльнең төшүе Русия Үзәк банкының чит ил акчасын сатып алуга кертелгән 12 процентлык комиссиясе бетерелүе белән бәйле. Русия банкының әлеге карары 11 апрельдән гамәлгә керде.
Әмма биржадагы доллар курсы рубльнең чын бәясен чагылдырмый - рублнең соңгы көннәрдәге үсешенә нигездә Русия Үзәк банкының көчле интервенцияләре нәтиҗәсендә генә ирешелде. Моның өчен банк үзендәге валюта резерваларын куллана һәм доллар сатып алуга төрле чикләүләр кулланып килә. Кара базарда бер доллар 99-115 сум арасында бәяләнә.
АКШ белән Һиндстан Украинадагы сугыш һәм Русиядән нефть сатып алуны киметү турында сөйләшәчәк
Бүген АКШ президенты Джо Байден Һиндстан премьер-министры Нарендра Моди белән видео элемтә аша сөйләшү үткәрәчәк. Ак йорт белдерүенчә, көн тәртибендә Русиянең Украинага карата алып барган сугышы, азык-төлек һәм чимал (нефть) базары темалары булачак.
“Рейтер” агентлыгы белдерүенчә, АКШ Һиндстанның Русиядән нефть сатып алуны арттыруына каршы булуын җиткерәчәк.
Украинада сугыш башланганнан соң, Һиндстан Русиядән 13 млн мичкә нефть сатып алган. Көнбатыш санкцияләре кертелгәннән соң, Русия нефтьне зур ташламалар белән саткан. “Рейтер” хәбәр иткәнчә, 2021 елда Һиндстан Русиядән барлыгы 16 млн мичкә нефть сатып алган булган.
Башкортстаннан тагын бер егет Украинадагы сугышта һәлак булган
Денис Ярославцев – Дуван районының Ярославка авылы егете. Аның үлеме турында Дуван районы башлыгы Фаил Мөхәммәдиев ВКонтакте социаль челтәрендә хәбәр итте.
Ярославцев 2003 елның 25 октябрендә туган. 2019 елда Ярославка авылының тугыз еллык мәктәбен тәмамлаган. Дуван күп профильле көллиятендә белем алган. Узган ел тракторчылык белгеченә укырга күчерелгән.
2021 елның ноябрендә үз теләге белән гаскәргә киткән диелә. Хәрби хезмәтне Белгород өлкәсенең Валуйки шәһәрендәге 34670 хәрби бүлектә үтәгән.
Русиянең электрон җиһазлар сатуга махсуслашкан сәүдә челтәрләре, кытлык вазгыятендә, кулланылышта булган смартфоннарны сатып алу һәм аларны кабат сатуга чыгару програмнары булдырган, дип яза "Коммерсантъ". Аерым алганда мондый програмнар "Связной" һәм "Ситилинк"та бар диелә. Дефицит һәм бәяләр үсү сәбәпле, тотылган телефоннарны алып сату програмнары барлык сәүдә челтәрләрендә дә барлыкка киләчәк, дип саный газет сораштырган белгечләр.
Узган кичтә Рамзан Кадыйров чираттагы видео мөрәҗәгать белән чыкты. Чечня башлыгы беренче чиратта Луһански һәм Донецкины “азат” итәчәкләрен әйтә. Һөҗүм Мариуполь белән генә тукталмаячак. Алга таба Киевны һәм башка шәһәрләрне дә басып алачакларын сөйли Кадыйров. Ул хәрби җитәкчеләрдән хисап һәм сугыш булачак урыннар билгеләнгән харита алуын белдерә.