Бүген Уфада ялгыз пикет вакытында тоткарланган Айнур Шәяхмәтовны 9нчы полиция бүлегеннән җибәргәннәр. Шәяхмәтовка Русия хәрби көчләрен дискредитацияләү турында беркетмә төзегәннәр. Бармак эзләрен бирүгә каршы килгәне өчен тагын бер беркетмә төземәкче булганнар, әмма кизү торучы прокурорга шалтыратканнан соң кире уйлаганнар. Бу хакта Шәяхмәтовның адвокатына сылтанып Уфа against Телеграм каналы яза.
Русия гаскәрләре тәүлек дәвамында Донецки һәм Луһански өлкәләренең 18 торак пунктын утка тотты. Украина полициясе хәбәр итүенчә, үлүчеләр һәм яраланучылар бар.
Атышта Grad ракета системнары, танклар һәм авыр артиллерия кулланылган. Донецки өлкәсендә 13 торак пунктта 17 объект җимерелгән – торак йортлар, шахта, офис биналары. Ике тыныч кеше үтерелгән, тагын бер кеше яраланган.
Украина эчке эшләр министрлыгы сугыш кануннарын һәм Украинаның территориаль бөтенлеген бозу турында җинаять эше ачты.
Социолог Искәндәр Ясәвиев Казандагы активист Андрей Бояршиновны мәхкәмәгә кадәр изолятордан азат итүне таләп итеп Change.org сайтында петиция чыгарды
"Без, бу мөрәҗәгатьне имзалаучылар, Андрей Бояршиновны азат итүне һәм көч кулланмаган ватандашлар өчен мәхкәмәгә кадәр изоляторда тотуны туктатуны таләп итәбез!" диелә анда.
29 мартта Татарстан югары мәхкәмәсе террорчылыкны аклауда гаепләнүче Андрей Бояршиновны өй сагыннан тикшерү изоляторына күчерергә карар итте.
18 мартта ФСБның Татарстан бүлеге, Бояршиновны җәмәгатьчелекне террорчылыкка чакыру, террорчылыкны җәмәгатьчелек алдында аклау һәм пропагандалауда гаепләп, Русия җинаять кодексының 205.2 маддәсенең икенче бүлеге нигезендә җинаять эше ачкан иде.
Җинаять эше ачу карарында аның интернет аша күп санлы кешеләрне террорчылыкка чакыручы һәм террор гамәлләрен аклаучы язмалар урнаштыруы язылса да, нәрсә язганлыгы белдерелми. Аның язмалары Русиянең Украинага каршы сугышын туктату таләбе белән протест чаралары узган көннәрдә чыккан иде.
Уфада Айнур Шәяхмәтов тоткарланган. Бу турыда ОВД-Инфо хәбәр итә. Шәяхмәтов башта Салават Юлаев һәйкәле янында ялгыз пикетта басып торган, аннары Башкортстан Дәүләт концертлар залы бинасы янына күчкән.
Ул тоткан платкатта "They have money for WAR but can't feed for the POOR" (Сугыш өчен акчалары бар, ләкин фәкыйрьләрне тукландыра алмыйлар). Бу Америка рэперы Тупак җырыннан алынган юллар.
Хәзерге вакытта Шәяхмәтов 9нчы полиция бүлегендә тотыла.
Рэпер Моргенштерн үзенә карата административ эш ачкан Чаллы полициясе хезмәткәреннән рухи компенсация таләп итә. Суммасы – 666 сум. Бу хакта рэперның адвокаты Сергей Жорин белдерде. Яклаучы үз ягының дәгъваларын китерде:
– Имеш, Моргенштерн текстларында наркотиклар пропагандалый дигән гариза язылган. Административ эш ачкан майор Богданов инде бөтен илгә танылды. Лингвистик экспертизалар бернинди дә наркотик пропагандасы булмавын исбатлады. Ләкин, бу административ тикшерүне канун кушканча туктатырга теләмичә, майор Алишерның татуировкаларына ботаник экспертиза билгеләде, – дип сөйләгән адвокат 5-tv.ru интервьюсында. Һәм бөтен ил һәм әйдәп баручы медиалар мыскыллаган әлеге экспертиза, янәсе, татуировкаларның берсе ниндидер үсемлеккә охшаш дип тапкан. Майор аның нәтиҗәләрен материал нигезенә салган да мәхкәмәгә җибәргән. Без бу гамәлләрне канунга каршы килә дип саныйбыз. Якын арада прокуратурага да, мәхкәмәгә дә шикаять биреләчәк. Алишер рухи зыянны кайтаруны таләп итәргә ниятли, ул аны 666 сумга бәяли.
Бровары мэры Игорь Сапожко әйтүенчә, 17 апрель иртәсендә Русия армиясе Броварыга ракета һөҗүме ясады. Аның сүзләренчә, кайбер корылмалар җимерелгән, үлгәннәр һәм җәрәхәт алучылар турында мәгълүмат юк.
Луһански өлкәсенең хәрби хакимияте башлыгы Сергей Гайдай шулай ук Северодонецкида атышлар турында әйтте. Нәтиҗәдә төнлә дүрт күпкатлы йорт яна башлаган. Новодружескида бер йорт җимерелгән.
Луһански өлкәсендә сугыш башланганнан бирле 155 кеше һәлак булган.
Европа берлеге Украинадагы сугыш аркасында Русиягә каршы алтынчы санкцияләр җыелмасын эшли. Бу хакта Европа комиссиясе башлыгы Урсула фон дер Ляйен Bild am Sonntagка биргән интервьюсында әйтте.
Аның сүзләренчә, бу чаралар банк секторы чикләүләре белән бәйле булачак. "Бигрәк тә тармакның 37% тәшкил иткән Сбербанкны өйрәнәбез", диде ул.
17 апрель иртәсенә төп хәбәрләр:
- Сугыш башыннан бирле Украинада кимендә 202 бала һәлак булган, 361 бала яраланган — Украина прокуратурасы.
- Азатлык радиосының урыс хезмәте "Москва" крейсерында кимендә бер хәрби үлүен раслады (мичман Иван Вахрушин). Русия диңгез армиясе җитәкчелеге крейсер экипажы белән очрашты, анда 100ләп диңгезче булды (крейсерда 500ләп кеше хезмәт иткән дип белдерелә).
- Украина президенты Владимир Зеленский Мариупольдәге украин хәрбиләрен үтерү Русия белән сөйләшүләргә нокта куячак дип белдерде. Андагы хәрбиләргә ярдәм итү өчен "төрле дәрәҗәдәге" сөйләшүләр алып барыла, ди ул.
- Русия саклану министрлыгы сугышта 23 меңнән артык Украина хәрбие һәлак булуын белдерде. Зеленский 2,5-3 мең һәлак булган гаскәри турында сөйләгән иде.
- Львов мәхкәмәсе Виктор Медведчукны сак астына алу карарын чыгарды. Берничә көн элек ул Украина күзләү хезмәте тарафыннан кулга алынган иде.