Сугыш көндәлеге. Беренче 85 көн

"S&P Global Market Intelligence" аналитик ширкәте хисабына күрә, санкцияләрдән соң Русия икътисадына 2021 елгы дәрәҗәгә кайту өчен 10 ел кирәк булачак. 2022 елда Русиянең тулаем эчке продукты 11,1%ка төшәчәк дип көтелә, дип фаразлый белгечләр.

Украина тулаем эчке продукты бу елда 45,7%ка төшәчәк ди алар. Ләкин тергезелү процессы Украинада тизрәк барыр, сугышка кадәр дәрәҗәгә кире кайту өчен ил икътисадына 5 ел җитәчәк.

• БМО мәгълүматына күрә, Украинада сугыш башыннан бирле кимендә 2665 сивил кеше һәлак булган.
• Мариупольдә гади халык күпләп җирләнгән өченче зур кабер табылды.
• Украина хакимияте хәбәр иткәнчә, Русия хәрбиләре басып алган Кременная шәһәрендә мэрия һәм полиция бүлегендә газ шартлаган.
• Белгород өлкәсе башлыгы янә Украина ягыннан атышлар турында хәбәр итте.

Русия президенты Владимир Путин Баш прокуратура хезмәткәрләре каршында чыгыш ясап, Федераль иминлек хезмәте Русиянең танылган тележурналистын үтерергә ниятләгән "террорчы төркемнең эшчәнлеген булдырмый калды" дип белдерде.

Ул журналистның исемен атамады. Соңрак ФСБга сылтама белән РИА Новости, сүз ВГТРКның Кремль карашларын яклаучы иң танылган алып баручысы- Владимир Соловьёв турында бара, дип хәбәр итте.

Украин ягы Мәскәүнең бу гаепләүләрен кире какты. ФСБның мондый белдерүләренә бәйсез экспертлар да шикләнеп карый.

Тулырак монда укый аласыз.

Украина президентының Кырым автономияле республикасында даими вәкиле вазифасына кырымтатар Тамила Ташева билгеләнде. Бу хакта вәкиллекнең матбугат хезмәте хәбәр итте.

Ташева Кырым платформасының вәкиллеге һәм офисы командасында 2019 елдан бирле эшли, диелә.

"Шуңа күрә бу билгеләнү алдагы казанышларны саклап калуга һәм аларның мәгънәви үсешенә юнәлдерелгән" – дип аңлаттылар вәкиллектә.

Бүген Башкортстан югары мәхкәмәсе 24 февраль көнне Украинадагы сугышка каршы ялгыз пикетка чыккан Дарья Кучеренкога 10 мең сум штраф түләтү карарын үз көчендә калдырды.

Журналист Дарья Кучеренко "кораллы көчләрне дискредитацияләү" маддәсе белән килешмәвен, бу маддәнең ил Конституциясен бозуын белдергән иде.

"Хакимиятләрнең сәясәте белән килешмәвемне, Русия хәрби хезмәткәрләренең гамәлләре турында үз фикеремне белдерергә хакым бар, мин сугышка каршы. Плакаттагы сүзләремдә бернинди дискредитацияләү күрмим. Әгәр безнең хокук яклау оешмалары дөреслекне дискредитация дип саный икән, бу әлеге оешмаларның проблемы", диде Кучеренко.

Украина сугышында Башкортстаннан тагын бер егет һәлак булды. Дуван районы Ярославка авылыннан Илья Корзников белән бүген хушлаштылар.

Корзников Рязань югары һава-десант хәрби училищесын тәмамлаган. Кабарда-Балкарда хезмәт иткән һәм шуннан Украина сугышына киткән. Бу хакта Пруфы яза. Азатлык Украинадагы сугышта һәлак булган Татарстан һәм Башкортстан егетләрен бер исемлеккә туплап бара.

Бүген Башкортстан югары мәхкәмәсе сугышка каршы стикерлар ябыштырган активист Олег Мамедовка 45 мең сум штраф түләтү карарын үз көчендә калдырды. Бу хакта “Уфа аgainst” телеграм каналы хәбәр итә.

— Әгәр ялгыз пикетка чыккан өчен тоткарлыйлар икән, ә митинглар җыеп булмый икән, димәк башка нәрсә сынап карарга кирәк дип уйладым, — дип аңлатты Мамедов стикерлар ябыштыруын. Бу интервьюны Азатлык сайтында укый аласыз. Төп бит ачылмаса, көзге-сайт.

Русия саклану министрлыгы бүген, 25 апрель, "Азовсталь"дән сивил кешеләр чыга алсын өчен һуманитар коридор ачарга вәгъдә итте.

Министрлыкның матбугат хезмәте хәбәр итүенчә, коридор җирле вакыт белән 14:00 дән ачылачак. Элегрәк Украина ягы "Азовсталь"дә якынча мең кеше яшеренүен хәбәр иткән иде.