"КАМАЗ" Мьянмада машиналар җитештерә башлау мөмкинлеген өйрәнә
2022 елның маенда "КАМАЗ" ширкәте Мьянманың җитештерү мөмкинлекләрен өйрәнү өчен бу илгә үз белгечләрен җибәрергә ниятли. Татарстан президенты Рөстәм Миңнеханов хәзер Мьянмада эш сәфәрендә. "КАМАЗ" машиналар җитештерү, хезмәткәрләрне укыту, сервис челтәрен үстерү мөмкинлекләрен карый. Тәкъдимне июньгә кадәр оештырып бетерергә һәм имзалауга тәкъдим итәргә ниятлиләр.
Тулырак монда укый аласыз.
Украина Русия һөҗүмнәренең артуын белдерде
Русия Украинада һөҗүм темпларын арттыра. Украина саклану министрлыгы вәкиле Александр Мотузяник сүзләренчә, Русия гаскәрләре барлык юнәлешләрдә дә диярлек интенсив атышлар алып бара. Аеруча Харьков һәм Донецки өлкәләрендә актив хәрби һөҗүмнәр бара. Министрлык мәгълүматынча, Русия гаскәрләренең төп максаты – фетнәчел Донецки һәм Луһански өлкәләрендә тулысынча контроль урнаштыру һәм аннексияләнгән Кырым ярымутравына җирдән коридор ачу.
Русия гаскәрләре Азов диңгезе яр буен контрольгә алды, әмма чынлыкта коридор әлегә юк, чөнки булган юллар Мариуполь аша уза, ә бу шәһәрнең бер өлеше элеккегечә украин гаскәрләре контролендә.
Тулырак монда укый аласыз.
АКШның Вәкилләр пулаты Русия белән бәйле активларны Украинага ярдәм итү өчен куллану мөмкинлеге бирүче канун өлгесен хуплы. Сүз 2 млн сумнан зуррак активлар турында бара. Шул исәптән Русия энергия ширкәтләрен милке дә кулланылачак. Моннан тыш Русия хакимиятләре белән хезмәттәшлек ярдәмендә алынган активлар да кулланылачак.
Европа берлеге Украинага пошлина түләмәү мөмкинлеге бирергә ниятли
Европа комиссиясе Европа берлегенә кертелгән украин продукциясенә барлык пошлиналарны һәм квоталарны вакытлыча гамәлдән чыгаруны хуплады. "Бу чаралар сәүдәгә этәргеч булачак һәм Украина икътисадына яшәргә мөмкинлек бирәчәк. Бу сугышта җиңү һәм сугыштан соң тернәкләнү өчен бик мөһим. Бу – Европа берлегенең авыр вакытта Украинага ярдәм итәргә ниятләвен күрсәтә", дип язды Европа комиссиясе башлыгы урынбасары Валдис Домбровскис.
Тулырак монда укый аласыз.
Швейцария Русиягә һәм Беларуска каршы яңа санкцияләр кертте
Яңа чаралар күмер, агач, цемент, диңгез азык-төлеге, уылдыкны импортлауга кагыла. Шулай ук санкцияләр "Русиянең сәнәгать мөмкинлеген ныгытуга ярдәм итәргә мөмкин" дип саналган тауарларны (сәнәгать роботлары яки химик эшләнмәләр) экспортлауны тыюны үз эченә ала.
"Швейцариядә Русия ватандашларына яки Русиядә яшәүче физик, юридик затлар өчен трастларны теркәргә ярамый. Мондый трастлар өчен каралган төрле хезмәтләр күрсәтү дә тыелачак", диелә Конфедерация хөкүмәте сайтындагы хәбәрдә.
Уфада ялгыз пикетка чыккан Айсылу Галина 15 мең сум штрафка тартылган
Уфаның Совет районы мәхкәмәсе Русия хәрби көчләрен дискредитацияләү маддәсе нигезендә 31 яшьлек Айсылу Галинага 15 мең сум штраф түләтү карарын чыгарган. Бу хакта Уфа against хәбәр итә.
18 апрельдә Галина Уфаның үзәк базары янына "Нет войне" (“Бетсен сугыш”) дигән шигарь тотып ялгыз пикетка чыккан иде.
Дискредитация маддәсе нигезендә минималь штраф 30 мең сум, әмма ниндидер “гадәттән тыш хәлләр” очрагында аны киметү мөмкин һәм хөкемдар Галинаның кечкенә баласы барлыгын исәпкә алып, аңа штрафны киметкән.
РБК: Кремльдә “ДНР” һәм “ЛНР” белән эшләүче куратор алышынд
"Куратор" дип формаль булмаган рәвештә Кремльнең югары дәрәҗәле түрәсен атыйлар, алар теге яки бу эш юнәлеше өчен җавап бирә. Әле күптән түгел генә "ДНР" һәм "ЛНР" белән эшләү өчен төп җаваплы булып Кремльдә чик буе хезмәттәшлеге идарәсен җитәкләүче президент администрациясе башлыгы урынбасары Дмитрий Козак торды. Хәзер бу юнәлеш өчен Сергей Кириенко җавап бирәчәк, бу турыда РБК үзенең биш чыганагына таянып яза. Кириенко президент администрациясе башлыгының беренче урынбасары вазифасында эчке сәясәт өлкәсе белән идарә итә.
Басма чыганаклары белдерүенчә, Козак "Мински килешүләрен" гамәлгә ашыру өчен җавап биргән, бу инде актуаль түгел. Ә кураторның алмашынуы "республикалар" белән багланышларның аерым тәртибенә һәм "бердәм эчке сәяси киңлек булдыру" максатына, максимум буларак, "республика"ларның Русия составына керү мөмкинлеге сценарие каралуга ишарә итә. Узган атнада Русия яклы телеграм-каналлар Кириенконың Донецкида булуын хәбәр итте.
Русиянең Украинага каршы сугышы нәтиҗәсендә русофобия арту башка халыклар телләренә игътибарны арттырырга мөмкин
Русиянең Украинага каршы башлаган сугышы аркасында дөньяда русофобия күренеше барлыкка килде. Урыс теле, урыс булу, русияле булу да Русиянең сугышына бәйләнде. Бу вазгыятьттә урыс булмау, башка милләт вәкиле булу, урысча түгел, туган телеңдә сөйләшү хәерлерәк дигән фикерләр дә таралды. Азатлык чит илләргә китеп татарлыгын эзләүчеләр, татар телен тирәнтен өйрәнә башлаучылар, белгечләр белән аралашты.