Милли Шура рәисе Васил Шәйхразиев фетнәчел Луһански "халык республикасы"на килде
Анда "Донбассның традицион диннәре экстремизм һәм неонацизмга каршы" дигән конференция узды.
Шәйхрәзиев конференциядә катнашучыларны Татарстан президенты исеменнән сәламләгән, Болгар дәүләтендә Ислам дине кабул ителүгә 1100 ел тулу уңаеннан үткәреләчәк чаралар турында сөйләгән.
- Украинаның Луһански төбәге 2014 елдан бирле Русия хакимиятен хуплаган фетнәчеләр контролендә.
- 24 февральдә Путин фәрманы белән урыс гаскәрләре Украинага һөҗүм иткәч, Украина мөселманнарының "Өммәт" диния нәзарәте башлыгы Сәид Исмәгыйлев Русия мөселманнарын "Путин хакимиятен хупламаска" чакырган иде
- Украинада яшәүче башка татарлар да Путин сәясәтен яклаучы Русия татарларын хөкем итеп чыкты
- 2014 елда Кырымны аннексияләгән вакытта да Мәскәү Татарстан вәкилләрен кырымтатарларын Русия ягына аудару максатында кулланган иде.
Уфа мәхкәмәсе фатиры тәрәзәсенә сугышка каршы плакат ябыштырган хатынга штраф салган
Уфада фатиры тәрәзәсенә сугышка каршы плакат ябыштырган Регина Ибраһимовага 15 мең сум штраф салынган.
Ул Украина байрагы ясалган сугышка каршы плакатларны коммуналь фатирдагы бүлмәсенең тәрәзәсенә ябыштырган булган, моны күршесе күреп полициягә әйткән.
Украина җирләренә бәреп кергәннән соң, Русия хакимиятләре кануннарны кырыслатты. Русиядә сугышка каршы чараларда катнашучыларга каршы яңа – "урыс гаскәрләре турында ялган мәгълүмат тарату һәм аларны дискредитацияләү" маддәләре нигезендә административ һәм җинаять эшләре ачалар.
Краматорскида төнге атыш нәтиҗәсендә 25 кеше яраланган
4 майдан 5 майга каршы төндә һава һәм ракет һөҗүмнәре нәтиҗәсендә, Украинаның Донецки өлкәсендәге Краматорски шәһәрендә кимендә 25 кеше яраланган. Бу хакта Telegram-да өлкәнең хәрби хакимияте башлыгы Павел Кириленко хәбәр итте.
Аның әйтүенчә, алты кешегә табиб ярдәме кирәк. Кириленко мәгълүматына күрә, тугыз торак йорт, мәктәп һәм сивил инфраструктураның башка күп объектларына зыян килгән.
Бер көн алдан Краматорски хакимияте, шәһәрдә атышлар сәбәпле 21 кеше һәлак булды дип белдергән иде, моны 8 апрельдә вокзалга ясалган һөҗүмнән соң, бер көн эчендә иң күп сивил үлгән очрак дип атады.
Хәбәрне тулысынча монда укырга мөмкин.
Украинадагы сугыш сәбәпле Татарстанда хәрби-патриотик эшкә үзгәрешләр кертеләчәк
Бу хакта 5 майда республиканың премьер-министры урынбасары Ләйлә Фазлыева белдерде.
Фазлыева сүзләренчә, әлеге үзгәрешләр Русиянең "Украинада алып барылучы "махсус операция" белән бәйле.
Аерым алганда, патриотик чараларга яшьләрне күбрәк җәлеп итү, аларны эзләү эшләрендә катнаштыру, студентларның хезмәт отрядларын республика икътисадына бәйләп эшләтү карала.
Шулай ук мәктәпләрдә һәм укытучылар белән эшләү көчәячәк, методик үзгәрешләр кертеләчәк.
Фазлыева сүзләренчә, Татарстанда хәрби-патриотик клуб вәкилләрен җәйге аланнарга әйдаман итеп җибәрәчәкләр. Моннан тыш, тәртипләре өчен балигъ булмаганнар эшләре комиссиясендә исәптә торган балалар да аларга беркетеләчәк.
"Автотор" заводы, "авыр икътисади вазгыятьтә" эшчеләренә бакчачылык өчен җир кишәрлекләре биргән
Калининградның BMW, Kia һәм Hyundai машиналарын җыю белән шөгыльләнә торган "Автотор" заводы, "авыр икътисади вазгыять" аркасында, үз хезмәткәрләренә бакча өчен җир кишәрлекләре бүлеп биргән.
"Оешма эшчеләренә өстәмә социаль ярдәм бирү максатында, Автотор акционерлары һәм җитәкчелеге, барлык теләк белдерүчеләргә бакча ясау өчен бушлай җир кишәрлекләре бүлеп бирергә булды", диелгән оешма хәбәрендә.
1000 дүрткел метрлы кишәрлекләр Люблино һәм Холмогоровка бистәләрендә урнашкан. Моның өчен ширкәт үз исемендәге 300 һектар җирне бүлеп биргән.
Тулырак монда укый аласыз.
Украиннарга Русия генералларын юк итәргә АКШ күзләү мәгълүматлары ярдәм иткән
Украина хәрбиләре Русиянең Киевка каршы сугышта катнашучы берничә генералын һәм офицерын Кушма штатлар биргән күзләү мәгълүматлары ярдәмендә юк иткән. Бу турыда, АКШ администрациясенең югары түрәләре сүзләренә нигезләнеп, New York Times хәбәр итә.
Басма чыганаклары әйтүенчә, Украина хәрбиләре аларның кайда булуы турында АКШтан алган мәгълүматны үзләрендәге мәгълүматлар белән берләштереп, шул юнәлештә ут ачкан һәм илгә һөҗүм итүчеләрнең җитәкчеләрен үтергән.
Бу мәгълүматлар Русиянең берничә генералын үтерергә ярдәм иткән диелә. Элегрәк Украина рәсмиләре Русия кораллы көчләренең 12 генералы үтерелүен белдергән иде.
NYT язуынча, Русия хәрби җитәкчеләренең кайда булуы турында мәгълүмат чыганакларының берсе буларак җир иярчене фотолары хезмәт итә.
"Дом" һәм UA телеканаллары журналисты Александр Махов Изюм шәһәре тирәсендәге атышлар вакытында һәлак булды, дип хәбәр итә "Радiо Свобода" журналисты Марьян Кушнир.
Махов Украинаның Донецки һәм Луһански өлкәләрендәге сугыш зонасында эшләгән, шулай ук "Военкор" подкастын алып барган. Ул Русия бәреп керү белән фронтка киткән.
Бөтенрусия җәмәгатьчелек фикерен өйрәнү үзәге (ВЦИОМ) мәгълүматларына караганда, Украинада барган сугыш Русия халкын берләштергән. Сораштыруда катнашкан 61 процент халык шулай дип җавап биргән. Бары тик 20 процент кына моңа капма-каршы фикер белдергән.
Шулай ук 61 процент халык Русия җәмгыяте көнбатышныкыннан гаделрәк дип белдергән, 17 процент моның белән килешмәгән.
Тулырак монда укый аласыз.