Роскомнадзор DOXA басмасының "Гаиләдә һәм эш урынында сугышка каршы бәхәс өчен белешмә"не бетерергә таләп итә. Бу текстта журналистлар Украинага һөҗүмнең төп 17 ялганны инкяр итә.
"Аэрофлот" 2 мартка кадәр Мексика, АКШ, Куба һәм Доминиканага рейсларны башкармаячак – ТАСС.
Русия һәм Украина вәкилләре Украина-Беларус чигендә Русиянең Украинага каршы агрессиясен туктату турында сөйләшүләргә кереште. Сугышучы илләрнең президентлары анда катнашмый. Сөйләшүләрне күзәтергә журналистлар кертелмәде.
Русия стратегик ракета гаскәрләре, Төньяк һәм Тын океан флотлары, Ерак ара авиация хәрбиләренең сугыш әзерлеге хәлендәге кизүдәгеләр саны арттырылган. Бу турыда саклану министры Сергей Шойгу Русия президент Владимир Путинга хәбәр иткән.
Кичә Путин Русиянең бу көчләрен сугышка әзерлек хәленә китерергә кушкан иде. Ул моны “Көнбатыш илләре югары җитәкчеләренең Русиягә карата агрессив сүзләр” әйтүен белән аңлатты.
FIFA Русиядә халыкара уеннар үткәрүне тыйды
⚽️Русия җыелмасы алга таба рәсми уеннарын "Русия футбол берлеге такымы" дигән исем белән уйнаячак
⚽️Бу җыелма өй матчларын нейтраль стадионнарда, тамашачысыз гына уйнарга тиеш булачак
⚽️Халыкара уеннарда Русия флагын һәм гимнын куллану тыела
⚽️FIFA Русия җыелмасын башка халыкара ярышлардан читләштерү мәсьәләсендә Халыкара Олимпия комитеты һәм UEFA белән сөйләшүләрен дәвам итәчәк
Украина эчке эшләр министры киңәшчесе Антон Геращенко Харьков шәһәренең Русия ягыннан “Град” реактив ракетлары белән утка тотылуын белдерде. “Дистәләрчә кеше һәла булды, йөзләрчә кеше яраланды”, диде ул.
Харьковның утка тотылуын элекке инфраструктура министры Владимир Емельян да раслады. “Путин Харьковка ракетлар ата”, — дип язды Twitter-да Емельян.
Харьковта яшәүчеләр шәһәрнең утка тотылуын күрсәтүче видеолар чыгарды.
Росавиация Русиянең утыздан артык иленә һава киңлеген ябуын хәбәр итте. Бу исемлектә Австрия, Бельгия, Болгарстан, Маҗарстан, Германия, Греция, Дания, Ирландия, Исландия, Испания, Италия, Кипр, Латвия, Литва, Люксембург, Мальта, Нидерланд илләре, Польша, Португалия, Румыния, Словакия, Словения, Финляндия, Франция, Хорватия, Чехия, Швеция һәм Эстония, Албания, Ангилья, Британия, Британиянең Виргиния утраулары, Гибралтар, Джерси, Канада, Норвегия бар.
Казанның Бауман урамы каршында Украинадагы сугышка каршы ялгыз пикет уза. Лиза исемле кыз "Кочаклашыйк" дигән язу тотып чыккан. Ул Украинада Русия алып барган сугышка каршы булган кешеләргә шул рәвешле ризасызлыкларын белдерергә тәкъдим итә.
Лиза Азатлыкка сөйләгәнчә, ул монда өч сәгать басып тора, һәм бер сәгать эчендә генә дә аның белән йөздән артык кеше кочаклашкан.
"Аннары инде мин санамый да башладым. Ләкин кешеләр бик күп килә", диде активист.
"Кайберәүләр сиңа берәр ярдәм кирәкмиме, Украинада кемең яши, дип сорый, кайда тууым белән кызыксына. Ләкин күбесе сүзнең ни турында баруын аңлый. Бу бик сөендерә", диде Лиза.
Аның күзәтүләренчә, сугышка каршылар күпчелекне тәшкил итә.